Phone Protection Tips in Rain: మీ ఫోన్ వర్షంలో తడిస్తే వెంటనే ఇలా చేయండి..
ABN, Publish Date - Aug 26 , 2025 | 03:28 PM
మీ ఫోన్ నీటిలో పడినా లేదా వర్షంలో తడిసినా భయపడకండి. సరైన సమయంలో సరైన చర్యలు తీసుకోవడం ద్వారా మీరు మీ స్మార్ట్ఫోన్ను సేవ్ చేసుకోవచ్చు. మీ ఫోన్ నీటిలో మునిగిపోయినట్లు చూస్తే కచ్చితంగా ఆందోళన కలగవచ్చు. ఆఫ్ అయిన ఫోన్ మళ్లీ పని చేయాలంటే..
Protect Mobile Phone during Monsoon: వర్షాకాలంలో స్మార్ట్ఫోన్లు తడిసిపోవడం చాలా సాధారణం. కొన్నిసార్లు బాత్రూంలో నీటిలో పడటం వల్ల లేదా ఫోన్పై కూల్ డ్రింక్ లేదా టీ పడటం వల్ల కూడా ఫోన్ తడిసిపోవచ్చు. కానీ భయపడాల్సిన అవసరం లేదు. మీరు త్వరగా, సరిగ్గా చర్య తీసుకుంటే మీ పరికరాన్ని సేవ్ చేయవచ్చు. మీ ఫోన్ తడిసిపోతే మీరు ఏమి చేయాలో ఇప్పుడు తెలుసుకుందాం.
ఫోన్ ఆఫ్ చేయండి
ముందుగా చేయవలసిన పని ఏమిటంటే వెంటనే ఫోన్ను ఆఫ్ చేయడం. ఫోన్ ఇంకా పనిచేస్తుందో లేదో తనిఖీ చేయడానికి ప్రయత్నించవద్దు, లేకుంటే షార్ట్ సర్క్యూట్ సంభవించి శాశ్వత నష్టం జరగవచ్చు. ఫోన్ ఆన్లో ఉంటే అది పూర్తిగా ఆఫ్ అయ్యే వరకు పవర్ బటన్ను నొక్కి పట్టుకోండి.
సిమ్, మెమొరీ కార్డ్ తొలగించండి
సిమ్ కార్డ్, మైక్రో SD కార్డ్, బ్యాటరీ తొలగించండి. ఇది తీశాక తడిసిన ప్రదేశాల్లోకి గాలి చొరబడి షార్ట్ సర్క్యూట్ ప్రమాదం తగ్గుతుంది. ఫోన్కు కవర్ ఉంటే దానిని కూడా తీసివేయండి.
ఫోన్ను ఆరబెట్టండి
ఇప్పుడు ఫోన్ బయటి భాగాన్ని ఆరబెట్టండి. ఫోన్ నుండి నీటిని తుడిచివేయడానికి శుభ్రమైన, మెత్తటి బట్ట లేదా కాగితపు టిష్యూ ఉపయోగించండి. పూర్తిగా శుభ్రం చేయండి. కానీ ఫోన్ను కదిలించడం లేదా కుదుపడం మానుకోండి. ఎందుకంటే ఇలా చేస్తే నీరు మరింత వ్యాప్తి చెందుతుంది. హెయిర్ డ్రైయర్, ఓవెన్ లేదా మైక్రోవేవ్ను ఉపయోగించవద్దు. ఇవి అంతర్గత భాగాలను దెబ్బతీస్తాయి.
బియ్యం ట్రిక్ వద్దు
అతి ముఖ్యమైన దశ లోపలి భాగాన్ని ఆరబెట్టడం. 'బియ్యం ట్రిక్' విస్తృతంగా వాడుతున్నారు. కానీ ఇది అంత ప్రభావవంతమైన చిట్కా కాదు. బియ్యం కొంత తేమను గ్రహించగలదు. కానీ బియ్యంపై ఉండే పొరలు ఫోన్ లోపలి పోర్టులను దెబ్బతీస్తాయి. దీనికి మంచి ఎంపిక సిలికా జెల్ ప్యాకెట్లు. తరచుగా కొత్త బూట్లు లేదా ఎలక్ట్రానిక్ వస్తువులతో వచ్చే ఈ చిన్న ప్యాకెట్లు తేమను గ్రహించేలా రూపొందించబడ్డాయి. మీ ఫోన్ను గాలి చొరబడని కంటైనర్లో లేదా సిలికా ప్యాకెట్లతో కూడిన జిప్లాక్ బ్యాగ్లో ఉంచండి.
మీ దగ్గర సిలికా జెల్ లేకపోతే ఫోన్ను బాగా గాలి ప్రసరింపజేసే వెంటిలేషన్ ఉన్న ప్రదేశంలో ఉంచండి. కావాలంటే ఫ్యాన్ ముందు కూడా ఉంచవచ్చు. కానీ నేరుగా వేడిని తగలకూడదు. పోర్టుల నుండి నీరు బయటకు ప్రవహించే స్థితిలో ఫోన్ను ఉంచండి.
48-72 గంటలు అలాగే ఉంచండి
ఫోన్ను కనీసం 48 నుండి 72 గంటలు ఆరనివ్వండి. ఇక్కడ ఓపిక అత్యంత ముఖ్యమైన విషయం. మీరు దానిని త్వరగా ఆన్ చేయడానికి ప్రయత్నిస్తే శాశ్వత నష్టం జరిగే ప్రమాదం పెరుగుతుంది. ఈ సమయంలో దాన్ని పదే పదే తనిఖీ చేయడానికి ప్రయత్నించవద్దు.
ఫోన్ ఆన్ చేయండి
ఎక్కువసేపు ఆరిన తర్వాత ఫోన్ను ఆన్ చేయడానికి ప్రయత్నించండి. అది ఆన్ కాకపోతే దానిని కొంతసేపు ఛార్జర్కు కనెక్ట్ చేయండి. అది ఇప్పటికీ ఆన్ కాకపోతే లేదా ఏదైనా తేడాగా కనిపిస్తే (స్క్రీన్ బ్లింక్ అవ్వడం లేదా సౌండ్ సమస్యలు వంటివి) మొబైల్ షాప్ కు వెళ్లండి.
నివారణే మేలు
గుర్తుంచుకోండి. నివారణ ఎల్లప్పుడూ మంచిది. మీరు నీటితో నిండిన ప్రదేశాలలో ఫోన్ను ఉపయోగిస్తుంటే కచ్చితంగా వాటర్ప్రూఫ్ కేసును ఉపయోగించండి.
ఇవి కూడా చదవండి:
లాప్టాప్ను క్లీన్ చేస్తున్నారా.. ఈ జాగ్రత్తలు తప్పనిసరి
రోజూ ఇయర్బడ్స్ వాడితే ఏమవుతుందో తెలుసా?
Read Latest and Technology News
Updated Date - Aug 26 , 2025 | 03:29 PM
