International Tennis Tournament: భువనగిరిలో అంతర్జాతీయ టెన్నిస్ సిరీస్ ప్రారంభం
ABN, Publish Date - Aug 26 , 2025 | 10:02 AM
యాదాద్రి భువనగిరి జిల్లాలోని న్యూ డైమెన్షన్ స్కూల్లో రాజా నర్సింహరావు ITF-J60 ఇంటర్ నేషనల్ టెన్నిస్ టోర్నమెంట్ ప్రారంభోత్సవ కార్యక్రమం జరిగింది. ఈ కార్యక్రమంలో ఎమ్మెల్యే కుంభం అనిల్ కుమార్ రెడ్డి, టెన్నిస్ క్రీడాకారులు తదితరులు పాల్గొన్నారు.
అంతర్జాతీయ టెన్నిస్ సిరీస్కు యాదాద్రి భువనగిరి జిల్లా కేంద్రమైన భువనగిరి పట్టణం ఆతిథ్యం ఇస్తోంది. స్థానిక న్యూడైమెన్షన్ టెన్సిస్ అకాడమీలో ఐదు రోజుల పాటు జరుగనుంది. రాజా నర్సింహారావు మెమోరియల్ ఇంటర్నేషనల్ టెన్నిస్ ఫెడరేషన్ అండర్-18 సిరీస్కు భారీ ఏర్పాట్లు చేశారు.
శని, ఆదివారాల్లో క్వాలిఫై మ్యాచ్లు జరిగాయి. ఈ నెల 26వ తేదీ నుంచి సెప్టెంబర్ 1వ తేదీ వరకు ప్రధాన మ్యాచ్లు జరుగనున్నాయి.
ఈ పోటీలను ప్రారంభిస్తున్న ఎమ్మెల్యే కుంభం అనిల్కుమార్రెడ్డి, తదితరులు
దేశంలోని పలు రాష్ట్రాలకు చెందిన క్రీడాకారులతో పాటు అమెరికా, కెనడా తదితర దేశాలకు చెందిన సుమారు 150 మంది క్రీడాకారులు ఈ పోటీల్లో పాల్గొంటున్నారు.
ఎనిమిది కోర్టుల్లో బాల బాలికలకు వేర్వేరుగా వందకు పైగా మ్యాచ్లు జరుగనున్నాయి. టోర్నీని తొమ్మిది మంది అంపైర్లు, ఒక చీఫ్ రెఫరీ, ఇంటర్నేషనల్ టెన్నిస్ ఫెడరేషన్ ప్రతినిధి జె.శివకుమార్రెడ్డి ఈ సిరీస్ను పర్యవేక్షించనున్నారు.
అందుకు కోర్టులను అంతర్జాతీయ ప్రమాణాలతో తీర్చిదిద్దారు. ఇప్పటికే పలువురు క్రీడాకారులు భువనగిరికి చేరుకున్నారు. వారందరూ భువనగిరి, యాదగిరిగుట్టలోని హోటళ్లలో బస చేస్తున్నారు.
విజేతలకు అంతర్జాతీయ ర్యాంకింగ్స్ కేటాయిస్తారు. ఆల్ ఇండియా టెన్నిస్ అసోసియేషన్ (ఏఐటీఏ), తెలంగాణ స్టేట్ టెన్సిస్ అసోసియేషన్ (టీఎస్టీఏ), యాదాద్రి భువనగిరి జిల్లా టెన్నిస్ అసోసియేషన్ సంయుక్తంగా నిర్వహిస్తున్న ఈ టోర్నీకి న్యూ డైమెన్షన్ టెన్నిస్ అకాడమీ అతిథ్యం ఇస్తోంది.
టోర్నీ ప్రారంభోత్సవంలో ఎమ్మెల్యే కుంభం అనిల్కుమార్రెడ్డి, కలెక్టర్ హనుమంతు, టీఎస్టీఏ కార్యదర్శి కేఆర్. రామన, ఉపాధ్యక్షుడు అశోక్ పాల్గొన్నారు.
కాగా, ఇదే అకాడమీలో ఈ ఏడాది ఏప్రిల్ 29వ తేదీ నుంచి మే 4వ తేదీ వరకు నేషనల్ టెన్నిస్ సిరీస్ జరగ్గా, నాలుగు నెలల వ్యవధిలోనే అంతర్జాతీయ టోర్నీని భువనగిరిలో నిర్వహిస్తుండటం విశేషం.
ఇప్పటి వరకు భారత్లో జరిగిన అంతర్జాతీయ టెన్నిస్ సిరీస్లన్నీ ఢిల్లీ, చెన్నై, ముంబై, హైదరాబాద్ తదితర నగరాలకే పరిమితం కాగా, మొట్టమొదటి సారిగా గ్రామీణ ప్రాంతంలో నిర్వహిస్తున్నట్లు ఏఐటీఏ ప్రతినిధులు పేర్కొన్నారు.
దేశంలోని గ్రామీణ ప్రాంతాల్లో కూడా అంతర్జాతీయ ప్రమాణాలతో టెన్నిస్ అకాడమీలు ఉన్నట్లు టెన్నిస్ ప్రపంచానికి తెలియజేయడం, గ్రామీణ ప్రాంతాల్లోని టెన్నిస్ క్రీడాకారులను ప్రోత్సహించే లక్ష్యంతోనే భువనగిరిలో అంతర్జాతీయ టెన్నిస్ సిరీస్ను నిర్వహిస్తున్నట్లు టీఎస్టీఏ ఉపాధ్యక్షుడు అశోక్ తెలిపారు.
కార్యక్రమంలో మాట్లాడుతున్న ఎమ్మెల్యే కుంభం అనిల్కుమార్రెడ్డి
క్రికెట్ ఆడుతున్న క్రీడాకారులు
విలు విద్య పోటీలో క్రీడాకారులు
Updated Date - Aug 26 , 2025 | 10:08 AM