1. • Home » National » Tesla set to debut in India with showrooms in Mumbai and Delhi location rents, and advances avn

Tesla Showroom Rents: ఇండియాలో టెస్లా షోరూమ్స్ అద్దె ఎంతంటే..

టెస్లా.. ప్రపంచ దిగ్గజ ఈవీ ఆటో సంస్థ ఇండియాలో ఏర్పాటు చేయబోతున్న షోరూమ్స్ విషయానికొస్తే, వాణిజ్య రాజధాని ముంబైలో అదీ.. అత్యంత ఖరీదైన ప్రాంతంలో.. మరి వాటి రెంట్స్, అడ్వాన్సెస్, లీజులు ఏ స్థాయిలో ఉంటాయన్నది అందరికీ ఆశ్చర్యకరమే కదా..

ఇంటర్నెట్ డెస్క్: ప్రపంచ కుబేరుడైన ఎలాన్ మస్క్ సంస్థ టెస్లా ఇండియాలో అరంగేట్రం చేస్తోంది. ఇప్పటికే దీని గురించి ఆటో రంగంతోపాటు, జనాల్లోనూ ఉత్సుకత మొదలైంది. మరో నెలలో (జూలై 2025) నాటికి భారతదేశంలో తన మొదటి విడత షోరూమ్‌లను ప్రారంభించేందుకు టెస్లా సిద్ధమవుతోంది. యావత్ ప్రపంచంలోనే ఎలక్ట్రిక్ వెహికల్స్ (EV) దిగ్గజమైన టెస్లా, ప్రపంచంలోని మూడవ అతిపెద్ద ఆటోమొబైల్ మార్కెట్‌లోకి అధికారికంగా ప్రవేశించబోతోందన్నమాట.

టెస్లా మొదటి బ్యాచ్ వాహనాలు, మోడల్ Y (రియర్-వీల్ డ్రైవ్) SUVలు ఇప్పటికే భారతదేశానికి చేరుకున్నాయని బ్లూమ్‌బెర్గ్ సంస్థ చెబుతోంది. ఈ యూనిట్లు చైనాలోని కంపెనీ తయారీ కేంద్రం నుండి భారత్‌కు వచ్చాయి. మోడల్ Y ప్రస్తుతం ప్రపంచంలోనే అత్యధికంగా అమ్ముడవుతున్న ఎలక్ట్రిక్ కారు. ఇక, టెస్లా ఫస్ట్ షోరూమ్ జూలై మధ్య నాటికి ముంబైలో ప్రారంభమవుతుందని, ఆ తర్వాత మరొక షోరూమ్ న్యూఢిల్లీలో ప్రారంభమవుతుందని బ్లూమ్‌బెర్గ్ సంస్థ వెల్లడించింది.

ఇక, ఇంతటి దిగ్గజ ఆటో సంస్థ ఏర్పాటు చేయబోతున్న షోరూమ్స్ వాణిజ్య రాజధాని ముంబైలో అదీ.. ముంబైలోని అత్యంత ఖరీదైన ప్రాంతంలో తన షోరూమ్స్ తెరవబోతోంది. మరి ఆ షోరూంల రెంట్స్, అడ్వాన్సెస్ ఏ స్థాయిలో ఉంటాయన్నది అందరికీ ఆశ్చర్యకరమే కదా.. ఇప్పుడు ఆ విశేషాలు చూద్దాం..

CRE మ్యాట్రిక్స్ యాక్సెస్ అనే సంస్థ ఈ లీజు కార్యకలాపాల్ని నిర్వహించింది. సదరు ఆస్తి రిజిస్ట్రేషన్ డాక్యుమెంట్స్ ప్రకారం, భారతదేశంలోని అత్యంత ఖరీదైన కమర్షియల్ డిస్ట్రిక్ట్ బాంద్రా కుర్లా కాంప్లెక్స్ (BKC)లో టెస్లా, ఐదు సంవత్సరాల లీజుకు, రూ. 23.38 కోట్ల మొత్తానికి 4,000 చదరపు అడుగుల షోరూమ్ స్థలాన్ని తీసుకుంది. ఇది ఒక రికార్డు. దేశంలో లీజు అద్దెల పరంగా చూస్తే ఈ మొత్తం రికార్డు స్థాయి రేటు. అంతేకాదు, ఇది ఇప్పటివరకు దేశంలో అత్యంత ఖరీదైన ఆటో షోరూమ్ లీజు ఒప్పందంగా నిలిచిందని నిపుణులు అంటున్నారు. ఇక, ఈ ప్రాంతం విషయానికొస్తే, ఇది వాణిజ్య రాజధాని ముంబైలో సెంట్రల్ బిజినెస్ డిస్ట్రిక్ట్. అంతేకాదు, బ్యాంకింగ్, ఆర్థిక సేవల పరిశ్రమ (BFSI) ఇంకా, ఫార్చ్యూన్ 500 కంపెనీలకు ఈ ప్రాంతం కీలక కేంద్రం.

ఇక, మరో లావాదేవీలో ముంబై నార్త్ అవెన్యూలోని మేకర్ మాక్సిటీ అనే కమర్షియల్ కాంప్లెక్స్‌లో కూడా టెస్లా.. షోరూమ్ స్థలాన్ని అద్దెకు తీసుకుంది. ఈ స్థలాన్ని టెస్లా కంపెనీ దాదాపు రూ. 35 కోట్ల నెలవారీ అద్దెకు తీసుకుంది. ఈ డీల్ ఫిబ్రవరి 27, 2025న ఆస్తి యజమాని అయిన యూనివ్కో ప్రాపర్టీస్ ఇంకా, టెస్లా ఇండియా మోటార్ అండ్ ఎనర్జీ ప్రైవేట్ లిమిటెడ్ మధ్య రిజిస్టర్ అయిందని ఈ డీల్‌కి సంబంధించిన రిజిస్ట్రేషన్ పత్రాలు చూపిస్తున్నాయి. ఇక, ఈ స్థలానికి సంబంధించి లీజు కాలపరిమితి ఫిబ్రవరి 16, 2025న ప్రారంభమైందని.. అద్దె రహిత కాలం ఫిబ్రవరి 16 నుండి మార్చి 31 వరకు ఉంది. ఇక, లీజు ఒప్పందంలో భాగంగా అద్దె ఏప్రిల్ 2025 నుండి ఫిబ్రవరి 2030 వరకు చెల్లించబడుతుంది. ఇక, ఈ లావాదేవీకి సెక్యూరిటీ డిపాజిట్ రూ. 2.11 కోట్లు. దీంతోపాటు, అద్దె ఒప్పందంలో ప్రతి ఏడాదీ వార్షిక ప్రాతిపదికన నెలకు 5% అద్దె పెరుగుదల నిబంధన ఉంది. ఈ లెక్కన చూస్తే, మొదటి ఏడాది నెలకు అద్దె రూ. 35.26 లక్షలు, రెండవ సంవత్సరంలో రూ. 37.02 లక్షలు, మూడవ సంవత్సరంలో రూ. 38.88 లక్షలు, నాల్గవ సంవత్సరంలో రూ. 40.82 లక్షలు ఇక, ఐదవ సంవత్సరంలో రూ. 42.86 లక్షలుగా ఉండబోతోంది.

ఈ రెండు స్థలాలతో పాటు, ముంబై కుర్లా ప్రాంతంలోని లోధా లాజిస్టిక్స్ పార్క్‌లో 24,565 చదరపు అడుగుల గిడ్డంగి స్థలాన్ని ఐదు సంవత్సరాలకు మొత్తం రూ. 24.38 కోట్ల అద్దెతో టెస్లా లీజుకు తీసుకుంది. ఇక్కడ గిడ్డంగి కార్యకలాపాలు నిర్వహిస్తారు.

ఈ వార్తలు కూడా చదవండి

సిట్‌ ముందుకు ప్రణీత్ రావు.. 650 ఫోన్ల ట్యా‌ప్‌పైనే విచారణ

యోగా డేలో తొక్కిసలాట.. స్పృహకోల్పోయిన యువతి

భార్యపై అనుమానం.. బిడ్డలపై ఘాతుకం... రవిశంకర్ అరెస్ట్

Read latest Telangana News And Telugu News