National Highway: బెంగళూరుకు హైస్పీడ్ కారిడార్
ABN, Publish Date - Jul 07 , 2025 | 02:49 AM
హైదరాబాద్ బెంగుళూరు హైవేకు ఎట్టకేలకు మోక్షం లభించింది. ఎన్నో ఏళ్లుగా పెండింగ్లో ఉన్న ఈ రహదారి విస్తరణ సమస్యకు కేంద్రం ఎట్టకేలకు తెరదించింది.
నాగ్పూర్ నుంచి హైదరాబాద్కు నిర్మించే రహదారి బెంగళూరు వరకు కొనసాగింపు
రెండు సెక్షన్లుగా రోడ్డు నిర్మాణానికి నిర్ణయం
రెండింటి డీపీఆర్లకూ టెండర్లు ఖరారు
గంటకు 120 కిలోమీటర్ల కంటే ఎక్కువ వేగంతో ప్రయాణించేలా రోడ్డు నిర్మాణం
తొలుత 6 లేన్లు.. భవిష్యత్తులో 8-12 లేన్లు!
హైదరాబాద్, జూలై 6(ఆంధ్రజ్యోతి): హైదరాబాద్- బెంగుళూరు హైవేకు ఎట్టకేలకు మోక్షం లభించింది. ఎన్నో ఏళ్లుగా పెండింగ్లో ఉన్న ఈ రహదారి విస్తరణ సమస్యకు కేంద్రం ఎట్టకేలకు తెరదించింది. హైదరాబాద్-బెంగుళూరు మార్గంలో హైస్పీడ్ కారిడార్ను నిర్మించాలని నిర్ణయించింది. దీని నిర్మాణానికి అవసరమైన సమగ్ర ప్రాజెక్టు నివేదిక(డీపీఆర్) రూపకల్పన బాధ్యతలను టెండర్ ద్వారా ఓ సంస్థకు అప్పగించింది. కాగా, డీపీఆర్ కోసం రూ.12.63 కోట్లు వెచ్చించనున్నట్టు ఎన్హెచ్ఏఐ పేర్కొంది. మరోవైపు నాగపూర్-హైదరాబాద్ వరకు కూడా మరో హైస్పీడ్ కారిడార్ను నిర్మించాలని కేంద్రం ఇదివరకే నిర్ణయించిన విషయం తెలిసిందే.
దీనికి అవసరమయ్యే డీపీఆర్ రూపకల్పన బాధ్యతను కూడా ఓ సంస్థకు కట్టబెట్టింది. తాజాగా డీపీఆర్ రూపకల్పనకు అవసరమైన ‘లెటర్ ఆఫ్ అగ్రిమెంట్’ కూడా చేసుకున్నారు. ఈ డీపీఆర్ కోసం రూ.14.99కోట్లు వెచ్చించనున్నారు. ఈ రెండు మార్గాలను ‘విజన్-2047’ జాతీయ రహదారుల మాస్టర్ ప్లాన్లో కూడా చేర్చినట్టు ఎన్హెచ్ఏఐ తెలిపింది. త్వరలోనే ఈ మార్గాలకు సంబంధించిన సర్వే పనులు మొదలు కానున్నాయి. జాతీయ రహదారుల విభాగంలో ఉన్న నార్త్సౌత్ కారిడార్ (ఎన్హెచ్-44)లో భాగంగా నాగ్పూర్ నుంచి హైదరాబాద్ వరకు నిర్మించబోయే జాతీయ రహదారినే బెంగళూరు వరకు కొనసాగించాలని నిర్ణయించింది. అందుకోసం ఈ రహదారిని రెండు సెక్షన్లుగా విభజించింది. నాగ్పూర్-హైదరాబాద్ వరకు ఒకటి, హైదరాబాద్ నుంచి బెంగళూరు వరకు మరో సెక్షన్గా చేపట్టనుంది.
ఈ హైస్పీడ్ కారిడార్ను 6 లేన్లుగా నిర్మించనుండగా, భవిష్యత్తులో 8లేన్లు, ట్రాఫిక్ రద్దీని బట్టి 12 లేన్లుగా విస్తరించే అవకాశం ఉంది. ఈ క్రమంలో 12 లేన్ల విస్తరణకు అవసరమైన స్థాయిలోనే భూసేకరణ చేయనున్నట్టు అధికార వర్గాలు అంటున్నాయి. ఈ రోడ్డు తెలంగాణలో 195 కిలోమీటర్లు, ఆంధ్రప్రదేశ్లో 260 కి.మీ, కర్ణాటకలో 106 కి.మీ మేర నిర్మాణం కానుంది. మొత్తం 1,150 కిలోమీటర్ల మేర నిర్మితమయ్యే ఈ రహదారికి రూ.35వేల కోట్లకు పైగా అవసరమవుతాయని అంచనా. నాగపూర్-హైదరాబాద్- బెంగుళూరు వరకు ప్రతిపాదించిన హైస్పీడ్ కారిడార్పై గంటకు 120 కి.మీ కన్నా ఎక్కువ వేగంతో వాహనాలు ప్రయాణించేలా రోడ్డును నిర్మించనున్నట్టు తెలిసింది. ఆ మేరకే సర్వే నిర్వహించనున్నట్టు సమాచారం.
Updated Date - Jul 07 , 2025 | 02:49 AM
