1. • Home » International » Nikki Haley Warns of Strained US India Relations Global Politics sri

Nikki Haley Warns: అమెరికా-భారత్ సంబంధాల్లో ఊగిసలాట..నిక్కీ హేలీ హెచ్చరిక

ఈ మధ్య కాలంలో భారత్-అమెరికా సంబంధాలు కొంత గందరగోళంలో పడినట్టు కనిపిస్తోంది. ఇందుకు కారణం ట్రంప్ ప్రభుత్వం భారత ఎగుమతులపై 50 శాతం టారిఫ్‌లు విధించడం. ఈ నేపథ్యంలో అమెరికాలో ప్రముఖ రిపబ్లికన్ నాయకురాలు నిక్కీ హేలీ ఇరు దేశాలు తిరిగి సంబంధాలను బలోపేతం చేసుకోవాలని సూచించారు.

భారత్, అమెరికాతో చాలా సంవత్సరాలుగా స్నేహ బంధం కొనసాగిస్తోంది. ఈ రెండు దేశాలు ప్రపంచంలోనే అతిపెద్ద ప్రజాస్వామ్య దేశాలుగా ఉన్నాయి. కానీ, ఇటీవల కొన్ని విషయాల వల్ల ఈ సంబంధంలో గందరగోళం నెలకొంది. అమెరికా అధ్యక్షుడు డొనాల్డ్ ట్రంప్ భారత్ ఎగుమతులపై 50 శాతం పన్నులు విధించారు. దీనికి కారణం, భారత్ రష్యా నుంచి చమురు కొనడం. ఈ నిర్ణయంతో ఇరు దేశాల మధ్య సంబంధాలు (Nikki Haley Warns india us) కాస్త ఒత్తిడికి గురయ్యాయి.

పోటీ నుంచి..

ఈ సమయంలో రిపబ్లికన్ నాయకురాలు నిక్కీ హేలీ ఇండియాకు కీలక సూచన చేశారు. ఈ గందరగోళాన్ని అధిగమించడానికి భారత్, అమెరికా కలిసి పనిచేయాలని అభిప్రాయం వ్యక్తం చేశారు. నిక్కీ హేలీ భారత సంతతికి చెందిన అమెరికన్ రాజకీయ నాయకురాలు. ట్రంప్ హయాంలో క్యాబినెట్ స్థాయిలో పనిచేసిన తొలి భారతీయ-అమెరికన్ ఆమె. 2023లో ఆమె అమెరికా అధ్యక్ష పదవికి పోటీ చేసి, 2024 మార్చిలో ఆ పోటీ నుంచి తప్పుకున్నారు. ఆమె ఇప్పుడు భారత్-అమెరికా సంబంధాల గురించి మాట్లాడుతూ, ఈ సమస్యను స్నేహపూర్వకంగా పరిష్కరించుకోవాలని సూచించారు.

రష్యన్ చమురు వివాదం ఏంటి?

అమెరికా.. భారత్‌పై 50 శాతం పన్నులు విధించడానికి ప్రధాన కారణం మన దేశం రష్యా నుంచి చమురు కొనడం. రష్యా-ఉక్రెయిన్ యుద్ధం తర్వాత పాశ్చాత్య దేశాలు రష్యా చమురును నిషేధించాయి. కానీ, భారత్ రష్యా నుంచి తక్కువ ధరకు చమురు కొనడం మొదలుపెట్టింది. దీనిపై ట్రంప్ అసంతృప్తి వ్యక్తం చేస్తూ, ఈ చమురు కొనుగోళ్లు రష్యా యుద్ధ యంత్రానికి సహాయం చేస్తున్నాయని ఆరోపించారు. దీని వల్ల ఆగస్టు 27 నుంచి భారత ఎగుమతులపై 25 శాతం అదనపు పన్ను విధించారు.

భారత్ స్పందన ఏంటి?

భారత ప్రభుత్వం ఈ పన్నులను అన్యాయం, అసమంజసం అని తెలిపింది. ప్రధానమంత్రి నరేంద్ర మోదీ, భారత రైతులు, జాలరుల ప్రయోజనాలతో ఎప్పటికీ రాజీపడబోమని స్పష్టం చేశారు. విదేశాంగ మంత్రిత్వ శాఖ అధికారులు, భారత్ చమురు కొనుగోళ్లు జాతీయ ప్రయోజనాలు, మార్కెట్ డైనమిక్స్ ఆధారంగా ఉన్నాయని చెప్పారు. అంతేకాదు, అమెరికా, యూరప్ దేశాలు కూడా రష్యాతో వాణిజ్యం కొనసాగిస్తున్నాయని, కేవలం భారత్‌ను మాత్రమే టార్గెట్ చేయడం సరికాదని వెల్లడించారు.

చైనాతో పోలిక ఎందుకు?

నిక్కీ హేలీ మరో ముఖ్యమైన విషయాన్ని ప్రస్తావించారు. చైనాను ఎదుర్కొవడానికి అమెరికాకు భారత్ స్నేహం చాలా కీలకం. భారత్ ప్రపంచంలో అత్యంత వేగంగా అభివృద్ధి చెందుతున్న ఆర్థిక వ్యవస్థ. 2023లో చైనాను మించి అత్యధిక జనాభా ఉన్న దేశంగా మారింది. యువ శ్రామిక శక్తి, ఆర్థిక వృద్ధి రేటు భారత్‌ను ప్రత్యేకంగా నిలబెడుతున్నాయి. చైనా వృద్ధాప్య జనాభాతో పోలిస్తే, భారత్‌లో యువత ఎక్కువ.

ఇది అమెరికాకు వ్యూహాత్మకంగా ముఖ్యమైన భాగస్వామిగా ఉంది. హేలీ అభిప్రాయంలో భారత్‌తో సంబంధాలను దెబ్బతీయడం అమెరికాకు పెద్ద ముప్పు అవుతుందని చెప్పకనే చెప్పారు. హేలీ చెప్పిన ప్రకారం ఇరు దేశాలూ కలిసి మాట్లాడుకోవాలి. రష్యన్ చమురు, పన్నుల విషయంలో ఒకరిపై ఒకరు ఆరోపణలు చేసుకోవడం కాకుండా, సమస్యను పరిష్కరించే దిశగా అడుగులు వేయాలి.

ఇవి కూడా చదవండి

సెప్టెంబర్ 2025లో బ్యాంక్ సెలవుల పూర్తి లిస్ట్..ఎన్ని రోజులు వచ్చాయంటే..

అర్జెంటుగా డబ్బు అవసరం.. పర్సనల్ లోన్ తీసుకోవాలా? గోల్డ్ బెటరా?

మరిన్ని జాతీయ, తెలుగు వార్తల కోసం క్లిక్ చేయండి