Liquor Survey Buzz: మద్యం ఎలా ఉంది
ABN, Publish Date - May 12 , 2025 | 03:18 AM
ఆంధ్రప్రదేశ్ ప్రభుత్వం మద్యం నాణ్యత, బ్రాండ్లు, ధరలపై వినియోగదారుల అభిప్రాయాల కోసం క్యూఆర్ కోడ్ సర్వే ప్రారంభించింది. సర్వేలో వ్యక్తిగత వివరాలు కోరడం వల్ల ప్రజల్లో సందేహాలు కలుగుతున్నాయి
నాణ్యత, బ్రాండ్లు సహా సిబ్బంది ప్రవర్తనపై సర్వే
ఎమ్మార్పీ ఉల్లంఘనపై ఆరా
షాపులు, బార్ల వద్ద క్యూఆర్ కోడ్
షాపులకు 5, బార్లకు 3 ప్రశ్నలు
గతంలో ఐవీఆర్ఎస్, వాట్సాప్ సర్వే
అమరావతి, మే 11(ఆంధ్రజ్యోతి): మద్యంపై రాష్ట్ర ప్రభుత్వం సర్వే ప్రారంభించింది. మద్యం నాణ్యత, ధరలు, గరిష్ఠ చిల్లర ధర(ఎమ్మార్పీ) ఉల్లంఘనలపై వినియోగదారుల నుంచి అభిప్రాయాలు స్వీకరిస్తోంది. గతంలో ఐవీఆర్ఎస్ కాల్స్, వాట్సాప్ ద్వారా సమాచారం సేకరించింది. ఇప్పుడు నేరుగా బార్లు, మద్యం షాపుల వద్ద అభిప్రాయాలు వెల్లడించే క్యూఆర్ కోడ్లు ఏర్పాటుచేసింది. ప్రతి బార్, షాపులో కౌంటర్, తాగే ప్రదేశం, బయట గోడలపైనా 4 నుంచి 5 చోట్ల క్యూఆర్ కోడ్లను ఎక్సైజ్ సిబ్బంది అతికించారు. వినియోగదారులు ఎప్పుడైనా ఆ క్యూఆర్ కోడ్ను స్కాన్ చేసి అందులో ప్రశ్నావళికి సమాధానాలు ఇవ్వడం ద్వారా అభిప్రాయాలు తెలియజేయవచ్చు. వాటి ఆధారంగా మద్యం నాణ్యత, ధరలు, సిబ్బంది ప్రవర్తన తదితర అంశాలపై ప్రభుత్వం చర్యలు చేపట్టనుంది.
ఈ సర్వేలో వైన్స్ దుకాణాలకు 5, బార్లకు 3 ప్రశ్నలు పేర్కొంటారు. వాటి కింద అవును, కాదు అనే ఆప్షన్లు ఉంటాయి. వాటిని ఎంపిక చేసిన తర్వాత పేరు, మొబైల్ నంబరు, నియోజకవర్గం, జెండర్, పుట్టిన తేదీ సమర్పించి అభిప్రాయాలను సబ్మిట్ చేయాలి. ఈ సర్వేలో వచ్చే అభిప్రాయాల ఆధారంగా ఎక్సైజ్ శాఖ చర్యలు చేపట్టనుంది. కాగా, గతంలో ఐవీఆర్ఎస్ కాల్స్, వాట్సాప్ ద్వారా చేసిన సర్వేలో మద్యంపై సానుకూల అభిప్రాయాలే వ్యక్తమయ్యాయి. అక్కడితో వదిలేయకుండా ఈ సర్వేను కొనసాగించేలా ఈ కొత్త విధానాన్ని ప్రభుత్వం ప్రారంభించింది.
సందేహాలు!
క్యూఆర్ కోడ్ సర్వేలో వివరాలు అడగటం సరికాదనే వాదన వినిపిస్తోంది. వినియోగదారుల వ్యక్తిగత వివరాల్లో ఫోన్ నంబరు తప్పనిసరిగా సమర్పించాలి. మద్యం విషయంలో చేసే సర్వేలో నియోజకవర్గంతో సహా వ్యక్తిగత విషయాలు తీసుకోవడం వల్ల భవిష్యత్తులో తమకు ఏవైనా ఇబ్బందులు ఎదురవుతాయేమోనని వినియోగదారులు భావిస్తున్నారు. దానివల్ల ఎక్కువ మంది సర్వేలో పాల్గొనకపోవచ్చనే అభిప్రాయం వ్యక్తమవుతోంది. మద్యంపై చేపడుతున్న సర్వే విషయంలో వినియోగదారుల నుంచి కొత్త ప్రశ్నలు వస్తున్నాయి. సాధారణంగా అంతా బాగుంటే వినియోగదారులు సర్వేలో పాల్గొనరు. ఏవైనా ఫిర్యాదులు ఉన్నప్పుడే స్పందిస్తారు. సర్వేలోని ప్రశ్నావళిలో ధరలు, నాణ్యత, బ్రాండ్ల లభ్యత అనేవి ప్రభుత్వ స్థాయిలో ఉంటాయి. దానిపై ఫిర్యాదులు వస్తే ఆ సమస్యను ప్రభుత్వమే పరిష్కరించాలి. కానీ, సిబ్బంది ప్రవర్తన ఎలా ఉంది? షాపుల్లో ఎమ్మార్పీ ఉల్లంఘనలు ఉన్నాయా? అనేవి ఆయా బార్లు, షాపులపై ఆధారపడి ఉంటాయి. ఒకవేళ ఏదైనా షాపులో ఎమ్మార్పీ కంటే ఎక్కువ తీసుకున్నారని సర్వే ద్వారా వెల్లడిస్తే దానిపై ఎలాంటి చర్యలు తీసుకున్నారనే వివరాలు తమకు పంపాలని వినియోగదారులు కోరుతున్నారు. ఎలాగూ వ్యక్తిగత వివరాలు, మొబైల్ నంబరు అడుగుతున్నందున చర్యల వివరాలు తెలపాలని సూచిస్తున్నారు.
ఇవీ ప్రశ్నలు..
1. గతంతో పోలిస్తే మద్యం నాణ్యత పెరిగిందా? 2. పాపులర్ మద్యం బ్రాండ్లు అందుబాటులో ఉన్నాయా? 3. ఇతర రాష్ర్టాలతో పోలిసే ఏపీలో మద్యం ధరలు తగ్గాయా? 4. మీ ప్రాంతంలోని దుకాణాలలో ఎమ్మార్పీ ఉల్లంఘనలు గమనించారా? 5. దుకాణ సిబ్బంది ప్రవర్తన ఎలాఉంది? అనే ప్రశ్నలు ఉంటాయి. అయితే, బార్ల విషయంలో ధరలు, ఎమ్మార్పీ ఉల్లంఘనల ప్రశ్నలు ఉండవు.
Updated Date - May 12 , 2025 | 03:18 AM
