Terrible Tourist Places: భారతదేశంలోని అత్యంత భయంకరమైన 5 టూరిస్టు ప్రాంతాలు ఇవే..
ABN, Publish Date - May 03 , 2025 | 09:45 PM
భారత దేశంలో అనేక అందమైన పర్యాటక ప్రదేశాలు ఉన్నాయనే విషయం తెలిసిందే. అయితే ఇదే ఇండియాలో కొన్ని భయానక పర్యాటక ప్రదేశాలు కూడా ఉన్నాయి.
భారత దేశంలో అనేక అందమైన పర్యాటక ప్రదేశాలు ఉన్నాయనే విషయం తెలిసిందే. అయితే ఇదే ఇండియాలో కొన్ని భయానక పర్యాటక ప్రదేశాలు కూడా ఉన్నాయి. ఇలాంటి 5 ప్రదేశాల గురించి ఇప్పుడు తెలుసుకుందాం.
రాజస్థాన్ అల్వార్లోని భాన్గర్ కోట ప్రపంచంలోనే అత్యంత భయానక ప్రదేశాలలో ఒకటి. 16వ శతాబ్దంలో నిర్మించిన ఈ కోటను శాపగ్రస్తమైనదిగా చెబుతుంటారు. ఈ కోట వెనుక ఒక యువరాణి, తాంత్రికుడి కథను చెబుతుంటారు. కోట లోపల, చుట్టుపక్కల ప్రాంతాల్లో దయ్యాలు ఉన్నాయని, అప్పుడప్పుడూ వింత శబ్దాలు వినపడుతుంటాయని స్థానికులు చెబుతుంటారు.
రాజస్థాన్లోని జైసల్మేర్ నుండి 18 కి.మీ దూరంలో ఉన్న కుల్ధారా గ్రామాన్ని దయ్యాల గ్రామంగా పిలుస్తుంటారు. 1825లో ఈ గ్రామంలో 83 మంది గ్రామస్తులు అకస్మాత్తుగా అదృశ్యమయ్యారు. గ్రామంలో 410 భవనాల అవశేషాలు, గ్రామ శివార్లలో మరో 200 భవనాలు ఉన్నాయి. ఈ గ్రామాన్ని వదిలివెళ్లే సమయంలో దీన్ని ఎవరూ స్వాధీనం చేసుకోలేరని, అలా చేస్తే వింత సమస్యలను ఎదుర్కొంటారని బ్రాహ్మణులు శపించారట. అప్పటి నుంచి ఈ గ్రామంలోకి వెళ్లేందుకు అంతా భయపడుతుంటారు.
కలకత్తాలోని నేషనల్ లైబ్రరీ కూడా భయానక ప్రాంతాల్లో ఒకటి. ఈ గ్రంథాలయ పునరుద్ధరణ సమయంలో జరిగిన ప్రమాదంలో 12 మంది మరణించారు.అందుకే ఈ ప్రదేశాన్ని దయ్యాల ప్రాంతంగా పిలుస్తుంటారు. రాత్రి వేళల్లో ఇక్కడ ఉండటానికి సెక్యూరిటీ గార్డులు కూడా భయపడుతుంటారు.
గోవాలోని త్రీ కింగ్స్ చర్చి కూడా భయానక ప్రాంతంగా ప్రసిద్ధి చెందింది. ముగ్గురు రాజులు ఈ చర్చి ఆస్తి కోసం పోరాడి ఒకరినొకరు చంపుకున్నారని, అప్పటి నుండి వారి ఆత్మలు ఇక్కడే తిరుగుతున్నాయని స్థానికులు చెబుతున్నారు.
సిమ్లాలోని చార్లెవిల్లే మాన్షన్ అనే భవనాన్న దెయ్యాలకు నిలయంగా పిలుస్తుంటారు. రాత్రి పూట ఈ భవనంలో అడుగుల చప్పుడు, వింత స్వరాలు వినిపిస్తుంటాయని స్థానికులు చెబుతున్నారు.
Updated Date - May 03 , 2025 | 09:46 PM
