Hyderabad - Bangalore Bus Fire Accident: బస్సు దగ్ధం.. 20 మందికిపైగా సజీవ దహనం
ABN, Publish Date - Oct 24 , 2025 | 09:14 AM
కర్నూలు జిల్లా కల్లూరు సమీపంలోని చిన్నటేకూరు గ్రామ వద్ద శుక్రవారం తెల్లవారుజామున ఘోర ప్రమాదం చోటుచేసుకుంది. హైదరాబాద్ నుంచి బెంగళూరు వెళ్తున్న బస్సు అగ్నికి ఆహుతి అయింది. ఈ ప్రమాదంలో 20 మందికిపైగా సజీవ దహనమయ్యారు. మరో 12 మంది స్వల్పంగా గాయపడ్డారు.
కర్నూలు జిల్లా కల్లూరు సమీపంలోని చిన్నటేకూరు గ్రామ సమీపంలో శుక్రవారం తెల్లవారుజామున ఘోర ప్రమాదం చోటుచేసుకుంది. హైదరాబాద్ నుంచి బెంగళూరు వెళ్తున్న ప్రైవేట్ ట్రావెల్స్ బస్సును బైక్ ఢీకొట్టి.. ముందుభాగంలోకి దూసుకెళ్లింది.
దీంతో బస్సులో ఒక్కసారిగా మంటలు చెలరేగాయి. ఈ ప్రమాదంలో బస్సులోని పలువురు సజీవ దహనమయ్యారు.
ఈ ప్రమాద సమయంలో బస్సులో 39 మంది ప్రయాణికులు ఉన్నట్లు తెలుస్తుంది. వారిలో 20 మందికిపైగా మృతి చెందారు. మరో 12 మంది స్వల్పంగా గాయపడ్డారు.
హైదరాబాద్ నుంచి వెళ్తున్న ఈ బస్సు కర్నూలు శివారులోని ఉలిందకొండ సమీపంలోకి రాగానే ద్విచక్రవాహనం ఢీకొట్టింది. ఈ బైకు బస్సు కిందికి వెళ్లి ఇంధన ట్యాంకును ఢీకొట్టడంతో మంటలు ఒక్కసారిగా చెలరేగి.. బస్సు అంతా మంటలు వ్యాపించాయి.
దీంతో గాఢ నిద్రలో ఉన్న ప్రయాణికులు తేరుకుని గట్టిగా అరుస్తూ అత్యవసర ద్వారం ద్వారా బయటకు దూకారు. పలువురు మంటల్లో చిక్కుకున్నారు. ఈ ఘటనపై ఎస్డీఆర్ఎఫ్, అగ్నిమాపక శాఖ సిబ్బంది, పోలీసులకు సమాచారం అందిన వెంటనే వారంత బస్సు దగ్ధమైన ప్రాంతానికి చేరుకుని సహాయక చర్యలు చేపట్టారు.
గాయపడిన వారిని కర్నూలు సర్వజన ఆసుపత్రికి తరలించారు. ఈ ప్రమాదంలో బస్సు పూర్తిగా కాలిపోయింది. ప్రయాణికుల్లో అత్యధికులు హైదరాబాద్కు చెందిన వారని తెలుస్తుంది. ఈ ప్రమాదంపై ప్రధాని మోదీ, తెలుగు రాష్ట్రాల సీఎంలు, విపక్ష నేతలు సైతం తీవ్ర దిగ్బ్రాంతి వ్యక్తం చేశారు.
Updated Date - Oct 24 , 2025 | 09:16 AM