Heavy Rainfall Andhra Pradesh: రేపు బంగాళాఖాతంలో అల్పపీడనం
ABN, Publish Date - Jul 24 , 2025 | 04:22 AM
ఉత్తర బంగాళాఖాతంలో గురువారం ఉపరితల ఆవర్తనం ఏర్పడనుంది. దీని ప్రభావంతో శుక్రవారం
వాయుగుండంగా మారే అవకాశం
నేడు కోస్తాకు భారీ వర్షసూచన
విశాఖపట్నం, అమరావతి, జూలై 23(ఆంధ్రజ్యోతి): ఉత్తర బంగాళాఖాతంలో గురువారం ఉపరితల ఆవర్తనం ఏర్పడనుంది. దీని ప్రభావంతో శుక్రవారం అల్పపీడనం ఏర్పడనున్నది. ఇది బలపడి పశ్చిమ బెంగాల్, ఉత్తర ఒడిశా తీరం దిశగా పయనించే క్రమంలో సముద్రంలోనే బలపడి వాయుగుండంగా మారుతుందని వాతావరణ నిపుణులు అంచనా వేస్తున్నారు. ఆతర్వాత తీరం దాటి ఒడిశా, పశ్చిమ బెంగాల్, జార్ఖండ్, బిహార్, ఛత్తీస్గఢ్ మీదుగా ఉత్తరప్రదేశ్ వైపు పయనిస్తుందని, దీంతో తూర్పు, మధ్య, ఉత్తర భారతంలోని పలు రాష్ట్రాల్లో భారీ నుంచి అతిభారీ వర్షాలు కురుస్తాయని ప్రైవేటు వాతావరణ సంస్థ స్కైమెట్ పేర్కొంది. కాగా, మంగళవారం ఉత్తర కోస్తా పరిసరాల్లో కొనసాగిన ఉపరితల ఆవర్తనం బుధవారం నాటికి పశ్చిమ మధ్య, వాయువ్య బంగాళాఖాతంలో ఉంది. మరోవైపు తూర్పు అరేబియా సముద్రం నుంచి మధ్య భారతం, తెలంగాణ, కోస్తాంధ్ర మీదుగా పశ్చిమ మధ్య బంగాళాఖాతం వరకు ఉపరితల ద్రోణి విస్తరించింది. దీని ప్రభావంతో బుధవారం కోస్తాలో పలుచోట్ల వర్షాలు, ఉత్తరకోస్తాలో అక్కడక్కడా భారీవర్షాలు కురిశాయి. గురువారం కోస్తాలో అనేకచోట్ల, రాయలసీమలో పలుచోట్ల వర్షాలు కురుస్తాయని, ఉత్తరకోస్తాలో అక్కడక్కడా భారీ నుంచి అతిభారీగా, దక్షిణ కోస్తాలో భారీవర్షాలు కురుస్తాయని వాతావరణ శాఖ తెలిపింది. ఇంకా ఈనెల 25,26 తేదీల్లో ఉత్తరకోస్తాలో భారీ నుంచి అతిభారీ వర్షాలు కురుస్తాయని, కోస్తా తీరం వెంబడి బలమైన గాలులు వీస్తున్నందున మత్స్యకారులు సముద్రంలో చేపల వేటకు వెళ్లరాదని హెచ్చరించింది.
దోసకాయను ఉప్పుతో తింటున్నారా? ఈ ముఖ్య విషయం తెలుసుకోండి.!
శరీరంలో కనిపించే ఈ లక్షణాలను అస్సలు నిర్లక్ష్యం చేయకండి.. లేదంటే..!
Updated Date - Jul 24 , 2025 | 04:22 AM
