National Handloom Day: నేతన్నలకు తెలుగుదేశం పార్టీకి అవినాభావ సంబంధం ఉందని: సీఎం చంద్రబాబు నాయుడు
ABN, Publish Date - Aug 07 , 2025 | 09:40 PM
జాతీయ చేనేత దినోత్సవం సందర్భంగా గురువారం (ఆగస్ట్ 07) మంగళగిరిలో ఏర్పాటు చేసిన కార్యక్రమంలో సీఎం చంద్రబాబు నాయుడు, ఐటీ, విద్యా శాఖ మంత్రి నారా లోకేష్, మంత్రి సవిత, ఎమ్మెల్సీ పంచుమర్తి అనురాధతోపాటు ఉన్నతాధికారులు పాల్గొన్నారు.
రాజధాని అమరావతిలో హ్యాండ్లూమ్ మ్యూజియం ఏర్పాటు చేస్తామని ఆంధ్రప్రదేశ్ ముఖ్యమంత్రి నారా చంద్రబాబు నాయుడు ప్రకటించారు.
గురువారం గుంటూరు జిల్లా మంగళగిరిలో ఏర్పాటు చేసిన 11వ జాతీయ చేనేత దినోత్సవంలో సీఎం చంద్రబాబు నాయుడుతోపాటు ఐటీ, విద్య శాఖల మంత్రి నారా లోకేష్ పాల్గొన్నారు.
ఈ సందర్భంగా సీఎ చంద్రబాబు నాయుడు మాట్లాడుతూ.. భారతీయ శక్తి, సంస్కృతి, సంప్రదాయాలకు ప్రతీక చేనేతలని పేర్కొన్నారు.
నైపుణ్యం, సృజనాత్మకత కలయిక చేనేతలని ఆయన అభివర్ణించారు. నేతన్నలకు తెలుగుదేశం పార్టీకి అవినాభావ సంబంధం ఉందని గుర్తు చేశారు. నేతన్నలకు ఉపాధి కల్పించిన నేత నందమూరి తారక రామారావు అని తెలిపారు.
వ్యవసాయం తర్వాత అధికంగా ఉపాధి కల్పించేది వస్త్ర పరిశ్రమ అని వివరించారు. 55, 500 మంది చేనేత కార్మికులకు రూ. 2 లక్షల చొప్పున రూ. 27 కోట్లు రుణాలుగా అందించామన్నారు.
అలాగే 90,765 కుటుంబాలకు 100 యూనిట్లు విద్యుత్ ఉచితంగా ఇచ్చామని చెప్పారు.
చేనేత కార్మికులకు తొలిసారిగా 50 ఏళ్లకే పింఛన్ అందించాలని నిర్ణయించామన్నారు. చిన్న వయస్సులోనే నేతన్నలు అనారోగ్యం పాలవుతున్న పరిస్థితి ఉందన్నారు.
అందుకే 50 ఏళ్లకే పింఛన్ తీసుకొచ్చామని వివరించారు. 50 శాతం సబ్సిడీతో మర మగ్గాలకు రూ. 80 కోట్లు ఖర్చు పెట్టామని చెప్పారు.
ఆగస్ట్ 2025 నుంచి 200 యూనిట్లు విద్యుత్ ఉచితంగా ఇస్తామని హామీ ఇచ్చారు. ఇఖ మరమగ్గాలకు 500 యూనిట్ల విద్యుత్ ఉచితంగా ఇస్తామన్నారు.
ఈ ఉచిత విద్యుత్ వల్ల 93 వేల కుటుంబాలకు లబ్ది చేకూరుతోందని ఆయన ఆశాభావం వ్యక్తం చేశారు. చేనతలకు ఎంత ఇచ్చినా తక్కువే అవుతుందన్నారు.
మంత్రి నారా లోకేష్ మాట్లాడుతూ... తాము కుటుంబపరంగా ఏదైనా శుభకార్యానికి హాజరైతే అక్కడ వారికి చేనేత వస్త్రాలనే అందజేస్తున్నామని చెప్పారు. తమ కుటుంబం చేనేత రంగాన్ని అభివృద్ధి చేసేందుకు కృషి చేస్తుందని నేతన్నలకు హామీ ఇచ్చారు.
ఈ కార్యక్రమంలో మంత్రి సవిత, టీడీపీ ఎమ్మెల్సీ పంచుమర్తి అనురాధ, పలువురు ప్రజా ప్రతినిధులతోపాటు ఉన్నతాధికారులు పాల్గొన్నారు.
ఈ కార్యక్రమంలో భారత్ బయోటెక్ ఎంపీ సుచిత్రా ఎల్లా సైతం పాల్గొన్నారు.
Updated Date - Aug 07 , 2025 | 09:40 PM