Paid Leave: ఉద్యోగుల పెళ్లికి 10 రోజులు వేతనంతో కూడిన సెలవు.. ప్రభుత్వం ప్రకటన
ABN, Publish Date - Jul 17 , 2025 | 08:36 PM
ప్రభుత్వ రంగాల్లో పనిచేస్తున్న ఎమిరాటీ ఉద్యోగులకు గుడ్ న్యూస్ వచ్చింది. అది ఏంటంటే పెళ్లి చేసుకునే అక్కడి ప్రభుత్వ ఉద్యోగులకు 10 రోజుల పూర్తి వేతనంతో కూడిన సెలవు మంజూరు చేయనుంది. ఈ మేరకు అక్కడి ప్రభుత్వం నిర్ణయం తీసుకుంది.
దుబాయ్ ప్రభుత్వం (Dubai Government) అక్కడి ప్రభుత్వ ఉద్యోగులకు గుడ్ న్యూస్ తెలిపింది. ఈ క్రమంలో వివిధ ప్రభుత్వ రంగాల్లో పనిచేసే ఎమిరాటీ ఉద్యోగులకు పెళ్లి కోసం 10 రోజుల పూర్తి వేతనంతో కూడిన సెలవు (Marriage Leave Dubai) మంజూరు చేయనున్నట్లు ప్రకటించింది. ఈ నిర్ణయం పని-జీవన సమతుల్యతను ప్రోత్సహించడంతోపాటు ప్రభుత్వ నిబద్ధతను స్పష్టం చేస్తుంది. ఈ వినూత్న విధానం ఎమిరాటీ కుటుంబాల సంతోషాన్ని, సామాజిక సమైక్యతను పెంపొందించే లక్ష్యంతో రూపొందించబడింది.
షేక్ మహమ్మద్ ఉత్తర్వు
యూఏఈ ఉపాధ్యక్షుడు, ప్రధానమంత్రి, దుబాయ్ పాలకుడు అయిన షేక్ మహమ్మద్ బిన్ రషీద్ ఆల్ మక్తూమ్ జారీ చేసిన డిక్రీ నంబర్ (31) 2025 ప్రకారం వెల్లడించారు. ఈ విధానం దుబాయ్లోని ప్రభుత్వ విభాగాలు, న్యాయ సంస్థలు, సైనిక ఉద్యోగులు, ఫ్రీ జోన్లు, దుబాయ్ ఇంటర్నేషనల్ ఫైనాన్షియల్ సెంటర్ వంటి ప్రత్యేక అభివృద్ధి జోన్లు, ఇతర సంస్థలలో పనిచేసే ఎమిరాటీ జాతీయులకు వర్తిస్తుంది. భవిష్యత్తులో ఈ విధానం మరిన్ని ఉద్యోగుల వర్గాలకు విస్తరించే అవకాశం కూడా ఉంది.
వివాహ సెలవు అర్హతలు
ఈ కొత్త విధానం ప్రకారం వివాహ సెలవు పొందడానికి కొన్ని నిర్దిష్ట షరతులు పాటించాలి
ఉద్యోగి (పురుషుడు లేదా స్త్రీ) జీవిత భాగస్వామి తప్పనిసరిగా ఎమిరాటీ పౌరుడై ఉండాలి
ఉద్యోగి తమ ప్రొబేషనరీ కాలాన్ని విజయవంతంగా పూర్తి చేసి ఉండాలి
వివాహ ఒప్పందం యూఏఈలోని అధీకృత అధికారులచే ధృవీకరించబడి ఉండాలి
వివాహ ఒప్పందం తేదీ డిసెంబర్ 31, 2024 తర్వాత ఉండాలి
ఈ సెలవు కోసం దరఖాస్తు చేసుకునే ఉద్యోగులు తమ వివాహ ధృవీకరణ పత్రం ధృవీకరించబడిన కాపీని సమర్పించాలి. ఈ షరతులు ఎమిరాటీ కుటుంబాలకు మద్దతు ఇవ్వడంతో పాటు, పెళ్లి పవిత్రతను గౌరవించేలా రూపొందించబడ్డాయి.
అదనపు ప్రయోజనాలు
ఈ వివాహ సెలవు సమయంలో, ఉద్యోగులు తమ పూర్తి గ్రాస్ జీతంతో పాటు, వారి వర్క్ప్లేస్లో వర్తించే మానవ వనరుల చట్టాల ప్రకారం అన్ని అలవెన్సులు, ఆర్థిక ప్రయోజనాలు కూడా లభిస్తాయి. ఈ సెలవును వివాహ ఒప్పందం తేదీ నుంచి ఒక సంవత్సరంలోపు, వరుసగా లేదా ఎప్పుడైనా ఉపయోగించుకోవచ్చు. ఒకవేళ ఉద్యోగి ఇతర కారణాలతో తమ సెలవును వచ్చే సంవత్సరానికి వాయిదా వేయాలనుకుంటే, వారి ప్రత్యక్ష సూపర్వైజర్ అనుమతితో ప్రభుత్వ సంస్థ దానిని ఆమోదించవచ్చు.
ఈ కుటుంబాలకు దుబాయ్ మద్దతు
ఈ విధానం దుబాయ్లోని ఎమిరాటీ ఉద్యోగుల జీవితాల్లో సంతోషం, స్థిరత్వాన్ని పెంపొందించడానికి ఒక కీలక నిర్ణయంగా చెప్పవచ్చు. వివాహం అనేది జీవితంలో ఒక కీలకమైన ఘట్టం. ఈ సెలవు ఉద్యోగులకు తమ కొత్త జీవితాన్ని ప్రారంభించడానికి సమయం, ఆర్థిక భద్రతను అందిస్తుంది. దుబాయ్ ప్రభుత్వం ఈ చర్య ద్వారా, తమ పౌరుల సంక్షేమానికి, కుటుంబ విలువలకు ఎంత ప్రాధాన్యత ఇస్తుందో చాటి చెప్పింది.
ఇవి కూడా చదవండి
కేంద్ర మంత్రి అశ్వినీ వైష్ణవ్కు సీఎం రేవంత్ రెడ్డి విజ్ఞప్తి
స్వచ్ఛ సర్వేక్షణ్ 2024-25లో ఏపీకి 5 పురస్కారాలు..
మరిన్ని జాతీయ, తెలుగు వార్తల కోసం క్లిక్ చేయండి
Updated Date - Jul 17 , 2025 | 08:37 PM
