Sridhar Vembu: పెరుగుతున్న పసిడి ధరలు.. రాబోయే ముప్పనకు హెచ్చరికా?
ABN, Publish Date - Oct 18 , 2025 | 10:11 PM
బంగారం ధరలు అంతకంతకూ పెరుగుతున్నందుకు ఇన్వెస్టర్లు సంతోషించాలా? లేక రాబోయే ముప్పునకు ఇది సంకేతమా? ఈ విషయంపై జోహో సంస్థ అధినేత శ్రీధర్ వెంబు స్పందించారు.
నానాటికీ పెరుగుతున్న బంగారం ధరలపై జోహో కార్పొరేషన్ అధిపతి శ్రీధర్ వెంబు స్పందించారు. రాబోయే ముప్పునకు ఈ పరిణామం సంకేతం కావొచ్చని హెచ్చరించారు.
తన దృష్టిలో బంగారం అంటే పెట్టుబడి సాధనం కాదని, ఆర్థికవ్యవస్థలో వ్యవస్థాగత ముప్పును ఎదుర్కొనే బీమా అని కామెంట్ చేశారు.
అమెరికా స్టాక్ మార్కెట్లోకి ఇబ్బడిముబ్బడిగా వచ్చిపడుతున్న పెట్టుబుడులు అస్థిర పరిస్థితులకు దారి తీస్తున్నాయన్న ఆర్థికవేత్త డా. గీత గోపీనాథ్ అభిప్రాయంతో శ్రీధర్ వెంబు ఏకీభవించారు.
అమెరికా ఆర్థిక వ్యవస్థలో భారీగా పోగైన అప్పులు, రుణ ఆధారిత పెట్టుబడులు చివరకు 2008 నాటి ఆర్థిక సంక్షోభం తరహా ముప్పును తెచ్చినా ఆశ్చర్యపోనక్కర్లేదని అన్నారు.
ఆర్థిక వ్యవస్థకు పునాది నమ్మకమేనని శ్రీధర్ వెంబు అన్నారు. వ్యవస్థపై విశ్వాసం సన్నగిల్లినప్పుడే బంగారంపై పెట్టుబడులు పెరిగి ధరలకు రెక్కలొస్తాయని చెప్పారు.
బంగారం ధరల్లో పెరుగుదల మార్కెట్పై, రాబడులపై అపనమ్మకాన్ని సూచిస్తున్నాయని అన్నారు. ఇది ఆశావాహదృక్పథానికి సంకేతం ఎంతమాత్రం కాదని చెప్పారు.
ఈ పరిస్థితిని చక్కదిద్దడానికి ఏఐ కూడా ఎక్కువగా కష్టపడాల్సి వస్తుందేమో అని సెటైర్ కూడా వేశారు.
ఆర్థికవేత్తలు అనేక మంది దాదాపు ఇదే తరహా హెచ్చరికలు చేస్తున్నారు. ఇన్వెస్టర్లు జాగరూకతతో వ్యవహరించాలని మరీ మరీ చెబుతున్నారు.
Updated Date - Oct 18 , 2025 | 10:16 PM