Beeranna Bonalu: తొలి ఏకాదశి రోజున భక్తి శ్రద్ధలతో కరీమాబాద్ ‘బీరన్న’ బోనాలు
ABN, Publish Date - Jul 06 , 2025 | 10:10 PM
తొలి ఏకాదశి రోజున భక్తి శ్రద్ధలతో కరీమాబాద్ ‘బీరన్న’ బోనాలు
తొలి ఏకాదశి రోజున భక్తి శ్రద్ధలతో కరీమాబాద్ ‘బీరన్న’ బోనాలు
వరంగల్ కరీమాబాద్లో బీరన్న బోనాల ఉత్సవానికి హాజరైన మంత్రి సురేఖ
విష్ణువుకు ప్రీతికరమైన రోజు ఉపవాసాల వ్రతాలు ప్రారంభమయ్యే శుభదినం.. పండుగలకు స్వాగతం పలికే రోజు ‘తొలి ఏకాదశి’.
ఆషాడ మాసంలో వచ్చే శుక్లపక్ష ఏకాదశిని ‘తొలి ఏకాదశి’ అంటారు. దీనినే ‘శయన ఏకాదశి’ అని కూడా పిలుస్తారు.
తొలి ఏకాదశి సందర్బంగా వరంగల్ కరీమాబాద్ లో కురుమ కులస్తులు బీరప్ప కామరతి, అక్క మహంకాళి దేవతమూర్తులకు బోనాలు సమర్పించారు.
రామస్వామి గుడి నుంచి బురుజు సెంటర్ మీదుగా ఒగ్గుడోలు కళాకారుల వాయిద్యాలు..శివాసత్తుల నృత్యాలు..బీరన్నల విన్యాసాలు మధ్య వందలాది మంది మహిళలు బోనాలతో పాటు పట్టువస్త్రాలతో బీరప్ప ఆలయానికి చేరుకున్నారు.
ఆలయంలో అమ్మవారికి ప్రత్యేక పూజలు చేసి బోనం నైవేద్యం సమర్పించిన అనంతరం పట్టు వస్త్రాలు కానుకగా ఇచ్చి ఒడిబియ్యం పోశారు.
శతాబ్ద క్రితం ప్లేగు వ్యాధి పుట్టి ప్రజలు చనిపోతుండగా వారు బీరన్న స్వామిని ప్రార్థించి, ఈ వ్యాధిని నివారిస్తే నీకు బోనం సమర్పిస్తాము అన్నారు. ఆ తర్వాత ప్లేగ్ వ్యాధి తగ్గిపోయిందన్న విశ్వాసంతో బోనాలు సమర్పించడం ప్రారంభించారు. అప్పటినుండి ఏటేటా వైభవంగా ఈ బోనాల ఆచారం కొనసాగుతోంది.
1957 సంవత్సరం నుండి సైదాపూర్ మండల కరీంనగర్ జిల్లా కి చెందిన బీరన్నలు వస్తున్నారు. బీరన్నలు పసుపు, కుంకుమ రాసుకుని, చిప్పలు మోగిస్తూ తాళాలు వేసుకుంటూ, కత్తుల తో విన్యాసాలు చేస్తూ ఊరేగింపులో ముందుంటారు.
బోనం అనేది ఒక మట్టి గిన్నె(పాత్ర) అందులో అన్నం, పెరుగు, బెల్లం పెట్టి పూలతో అలంకరించి, తల మీద మోసి బీరన్నకి సమర్పిస్తారు.
బోనాల్లో ముఖ్యమైన ఘట్టం గావు. ప్రత్యేక వేషధారణలో ఉన్న బీరన్నలు గావు పడుతారు. గొర్రె పిల్ల తలను కోరికి రక్తం చిందిస్తుండగా..భక్తులు గొర్రె పొట్టేలు రక్తాన్ని వీర తీలకంగా పెట్టుకోవడానికి యువకులు ఉత్సాహం కనుబరుస్తారు.
బోనాలతో ఉన్న మహిళలందరూ గావు పట్టిన గొర్రె పిల్లను దాటుతూ ఆలయానికి చేరుకుంటారు. మహిళలు ఊరేగింపుగా ఆలయానికి చేరుకొని బీరన్నకు మహిళలు కొత్త బట్టలు పెట్టి కొత్త కుండలో తెచ్చిన బోనాన్ని స్వామికి నైవేద్యంగా సమర్పిస్తారు.
ప్రతి ఐదు సంవత్సరాలకు ఒకసారి తొలి ఏకాదశి ముందు రోజున బీరన్నలు కురుమ కులస్తుల ఇంటిపై బలి బలి అంటూ సరుగు చల్లుతారు.
Updated Date - Jul 06 , 2025 | 10:13 PM