Blood Donation: రక్తదానంతో క్యాన్సర్‌ రక్ష

ABN, Publish Date - Mar 18 , 2025 | 03:59 AM

రక్తదానం ప్రాణదానం అంటారు. రక్తదానం వల్ల ప్రత్యేకించి దాతకు లుకేమియా (రక్త క్యాన్సర్‌) నుంచి రక్షణ దక్కుతుందని తాజా అధ్యయనంలో వెల్లడైంది. వివరాల్లోకి వెళ్తే....

వయసు పైబడేకొద్దీ రక్తాన్ని ఉత్పత్తి చేసే మూల కణాల్లో సహజసిద్ధ ఉత్పరివర్తనాలు చోటుచేసుకుంటూ ఉంటాయి. వాటిలో కొన్ని ఉత్పరివర్తనాలు లుకేమియా ముప్పును పెంచుతాయి. అయితే క్రమం తప్పకుండా రక్తదానం చేసే వారిలో ఈ ఉత్పరివర్తనాలు క్యాన్సర్‌కు దారి తీయకుండా ఉంటాయని లండన్‌లోని ఫ్రాన్సిస్‌ క్రిక్‌ యూనివర్శిటీ పరిశోధకులు కనిపెట్టారు. క్రమం తప్పకుండా రక్తదానం చేసేవారి శరీరంలో కొత్త రక్తకణాలు ఉత్పత్తి అవుతూ మూల కణాలు మరింత సమర్థంగా మారిపోతూ ఉంటాయనీ, వీరిలో ఆరోగ్యకరమైన, మరింత ప్రభావవంతమైన రక్తకణాలు తయారవుతూ ఉంటాయనీ పరిశోధకులు సూచిస్తున్నారు. గుండె ఆరోగ్యంలో రక్తం చిక్కదనం కీలక పాత్ర పోషిస్తూ ఉంటుంది. చిక్కని రక్తం, రక్తప్రవాహాన్ని కొంతమేరకు కుంటు పరిచి, అధిక రక్తపోటుకూ, అంతిమంగా గుండెజబ్బులకూ దారి తీస్తుంది. కానీ క్రమం తప్పక రక్తదానం చేసేవారిలో రక్తపోటు స్థిరంగా ఉంటూ, గుండెజబ్బులు, గుండెపోట్ల ముప్పు తగ్గుతుందని కూడా పరిశోధకులు వివరిస్తున్నారు.