నంబరు ప్లేట్ మార్చాల్సిందే...
ABN, Publish Date - Jul 11 , 2025 | 01:16 AM
జగిత్యాల, జూలై 10 (ఆంధ్రజ్యోతి): రహదారి భద్రతపై సుప్రీంకోర్టు తీర్పును అనుసరించి అన్ని రకాల వాహనాలకు హై సెక్యూరిటీ రిజిస్ట్రేసన్ నంబరు ప్లేట్ (హెచ్ఎస్ఆర్ఎన్పీ) తప్పనిసరి చేస్తూ రవాణాశాఖ ఉత్తర్వులు జారీ చేసింది. ఈ నంబరు ప్లేట్ చివరన ఉన్న లేజర్ కోడ్ను ట్రాక్ చేసి వాహనదారుడి పేరు, వివరాలను వాహనం ధ్వంసం అయినా లేజర్ కోడ్ ద్వారా తెలుసుకునే అవకాశం ఉంటుంది.
-పాత వాహనాలకు హై సెక్యూరిటీ నంబర్ ప్లేట్
-2019కు ముందు కొన్న వాటికి తప్పనిసరి
-ఇప్పటికే ఉత్తర్వులు జారీ చేసిన రవాణా శాఖ
-సెప్టెంబరు 30వ తేదీ వరకు గడువు
-జిల్లాలో 1.68 లక్షల వాహనాలు
జగిత్యాల, జూలై 10 (ఆంధ్రజ్యోతి): రహదారి భద్రతపై సుప్రీంకోర్టు తీర్పును అనుసరించి అన్ని రకాల వాహనాలకు హై సెక్యూరిటీ రిజిస్ట్రేసన్ నంబరు ప్లేట్ (హెచ్ఎస్ఆర్ఎన్పీ) తప్పనిసరి చేస్తూ రవాణాశాఖ ఉత్తర్వులు జారీ చేసింది. ఈ నంబరు ప్లేట్ చివరన ఉన్న లేజర్ కోడ్ను ట్రాక్ చేసి వాహనదారుడి పేరు, వివరాలను వాహనం ధ్వంసం అయినా లేజర్ కోడ్ ద్వారా తెలుసుకునే అవకాశం ఉంటుంది. 2019 ఏప్రిల్ ఒకటి కన్నా ముందు కొనుగోలు చేసిన వాహనాలకు ఈ నంబరు ప్లేటు బిగించని పక్షంలో రోడ్లపైకి వచ్చే అవకాశం ఉండదు. సెప్టెంబరు 30వ తేదీ లోగా అమర్చుకోవాలని రవాణా శాఖ స్పష్టం చేసింది. లేని పక్షంలో భారీ జరిమానాలు, శిక్ష విధించేలా ప్రణాళికలు సిద్ధం చేస్తోంది. ఈ నంబరు ప్లేట్లు అమర్చుకునేందుకు వాహనాల తీరు ఆధారంగా ప్రత్యేక రుసుములు ప్రకటించారు.
ఫకాలం చెల్లిన వాహనాల కట్టడి..
కాల పరిమితి ముగిసిన వాహనాలు రోడ్లపై తిరగకుండా రవాణా శాఖ చర్యలు తీసుకుంటోంది. అందులో భాగంగా 15 ఏళ్ల కాల పరిమితి ముగిసిన వాహనాలను గుర్తించే ప్రక్రియ చేపట్టింది. కాల పరిమితి ముగిసిన వాహనాలు వేర్వేరు నంబరు ప్లేట్లతో రోడ్లపై తిరుగుతూ ప్రమాదాలకు కారణమవుతున్నాయి. అనేక వాహనాలకు సకాలంలో సామర్థ్య పరీక్షలు చేయించడం లేదు. ఇకపై అలాంటి వాటికి అడ్డుకట్ట పడనుంది. జిల్లా వ్యాప్తంగా 2019 మార్చి31 లోగా రిజిస్ట్రేషన్ చేసుకున్న వాహనాలు సుమారు 1.68 లక్షల వరకు ఉన్నాయి. ఇందులో పాత వాహనాలు అంటే కాల పరిమితి ముగిసినవి మినహా మిగతా వాటికి హై సెక్యూరిటీ నంబరు పేట్లు బిగించుకోవాల్సిందేనని అధికారులు స్పష్టం చేశారు. 2019 ఏప్రిల్ తర్వాత వాహనాలకు ఇప్పటికే హై సెక్యూరిటీ నంబరు ప్లేటు నిబంధన అమలవుతోంది. ఇప్పటి వరకు హైసెక్యూరిటీ రిజిస్ట్రేషన్ నంబరు ప్లేట్ బిగించుకున్న వాహనాలు సుమారు 20 వేల వరకు ఉన్నాయి. ఇందులో చాలా వాహనాలు సాధారణ నంబర్ ప్లేట్తో తిరుగుతున్నాయి. ప్లేట్ బిగించని వాహనాలను అమ్మాలన్నా....కొనాలన్నా ఇబ్బందులు తప్పేలా లేవు. ఆర్టీఏ అధికారుల తనిఖీల్లో పట్టుబడితే జరిమానా వేయడంతో పాటు వాహనం సీజ్ చేయనున్నారు.
ఫమార్పు ఇలా....
పాత వాహనానికి కొత్తగా హైసెక్యూరిటీ నంబరు ప్లేటు పొందాలంటే వాహనదారుడే నేరుగా ఆన్లైన్లో నమోదు చేసుకోవాలి. నిర్ణీత వెబ్సైట్లో వాహనం నంబరు, వాహనం రకం, కంపెనీ, జిల్లా తదితర వివరాలు నమోదు చేయాలి. నంబర్ ప్లేట్ షోరూం వివరాలు వస్తాయి. వెంటనే ఆ షోరూంకు వెళ్లి వాహనానికి హైసెక్యూరిటీ నంబర్ ప్లేట్ అమర్చుకుని ఫొటో తీసి మరోసారి వెబ్సైట్లో నమోదు చేయాల్సిన బాధ్యత వాహనదారుడిపై ఉంది. ఈ విధానంతో నిరక్షరాస్యులు, స్మార్ట్ఫోన్లు లేని వాహనదారులు అయోమయానికి గురికానున్నారు.
విధిగా అమర్చుకోవాలి...
-బద్రునాథ్, జిల్లా రవాణా శాఖ అధికారి
పాత వాహనాలకు హై సెక్యూరిటీ నంబర్ ప్లేట్లు విధిగా అమర్చుకోవాల్సిందే. ప్రభుత్వం విడుదల చేసిన ఉత్తర్వుల మేరకు నిర్ణయించిన ఫీజుతో నంబర్ ప్లేట్ తీసుకోవాల్సి ఉంటుంది. రోడ్లపై తిరిగే ప్రతి వాహనం హై సెక్యూరిటీ రిజిస్ట్రేషన్ నంబర్ ప్లేట్ అమర్చుకోవాలి. తనిఖీలో పట్టుబడితే కేసులు నమోదు చేసి వాహనాలు సీజ్ చేస్తాం. అవసరమైతే బీమా రిజిస్ట్రేషన్ తదితర సేవలు నిలిపివేసేలా రవాణా శాఖ చర్యలు చేపడుతోంది.
-------------------------------------------------------------------
రుసుము (రూపాయల్లో)
-------------------------------------------------------------------
ద్విచక్ర వాహనాలు....300-350
త్రిచక్ర వాహనాలు....350-450
కార్లు....500-700
కమర్షియల్ వాహనాలు...600-800
-------------------------------------------------------------------
జిల్లాలో వాహనాల వివరాలు ఇలా...
-------------------------------------------------------------------
అంబులెన్స్లు - 99
ఆటో రిక్షాలు - 5,846
బస్సులు - 137
స్కూల్ బస్సులు - 480
మోటార్ క్యాబ్స్ - 4,546
మోటార్ కార్స్ - 14,831
మోటార్ సైకిల్స్ - 1,42,665
-------------------------------------------------------------------
మొత్తం - 1,68,604
-------------------------------------------------------------------
Updated Date - Jul 11 , 2025 | 01:16 AM
