5డీ క్రిస్టల్‌ మెమొరీలో మానవ జీనోమ్‌

యూనివర్సిటీ ఆఫ్‌ సౌతాంప్టన్‌ పరిశోధకుల ఘనత

భవిష్యత్తులో మానవజాతి అంతరించిపోతే.. మళ్లీ సృష్టించడానికి వీలుగా క్రిస్టల్‌లో జన్యుసమాచారం

లండన్‌: స్టీవెన్‌ స్పీల్‌బర్గ్‌ తీసిన ‘జురాసిక్‌ పార్క్‌ (1993)’ సినిమా కథ గుర్తుందా? చెట్టు జిగురులో ఇరుక్కుపోయిన ఒక దోమ నుంచి డైనోసార్‌ డీఎన్‌ఏను సేకరించి.. క్లోనింగ్‌ ద్వారా రాక్షసబల్లులను సృష్టిస్తారు ఆ సినిమాలో! అలా అంతరించిపోయిన డైనోసార్లలాగానే.. ఎప్పటికైనా మనుషులు కూడా అంతరించిపోతే? అచ్చం ఆ సినిమాలో లాగానే మనుషులను మళ్లీ మానవజాతిని పునఃసృష్టించడానికి వీలుగా సౌతాంప్టన్‌ వర్సిటీ పరిశోధకులు పూర్తిస్థాయి హ్యూమన్‌ జీనోమ్‌ను ఒక ‘5డీ మెమొరీ క్రిస్టల్‌’లో భద్రపరిచారు. ప్రస్తుతం మనకు అందుబాటులో ఉన్న సాంకేతిక పరిజ్ఞానంతో.. కేవలం జెనెటిక్‌ సమాచారాన్ని ఉపయోగించి మానవులను కృత్రిమంగా సృష్టించలేం. కానీ, భవిష్యత్తులో ఆ స్థాయి టెక్నాలజీ ఉన్న జీవులుగానీ.. యంత్రాలుగానీ.. అంతరించిన మానవజాతిని మళ్లీ సృష్టించాలని భావిస్తే ఈ సమాచారం వారికి/వాటికి ఉపయోగపడుతుందనే ఆశాభావంతో ఈ క్రిస్టల్‌ను తయారుచేశారు. దీన్ని ‘మెమొరీ ఆఫ్‌ మ్యాన్‌కైండ్‌ ఆర్కైవ్‌’ అనే ప్రత్యేక టైమ్‌ క్యాప్సూల్‌లో భద్రపరుస్తున్నారు. ఈ టైమ్‌ క్యాప్సూల్‌ ఆస్ట్రియాలోని హాల్‌స్టాట్‌ సాల్ట్‌కేవ్‌లో ఉంది. ఇతర డేటా స్టోరేజ్‌ ఫార్మాట్లలో భద్రపరచిన డేటా కాలం గడిచేకొద్దీ డీగ్రేడ్‌ అవుతుందని.. కానీ, ఈ మెమొరీ క్రిస్టల్‌లో భద్రపరిచిన డేటా కొన్ని వందల కోట్ల సంవత్సరాల వరకూ భద్రంగా ఉంటుందని పరిశోధకులు తెలిపారు. ‘‘1000 డిగ్రీల సెల్సియస్‌ దాకా ఉష్ణోగ్రతను.. గడ్డకట్టించే చలిని.. మంటలను సైతం ఈ క్రిస్టల్‌ తట్టుకోగలదు. చదరపు సెంటీమీటరుకు 10 టన్నుల తాకిడిని సైతం భరించగలదు. దీర్ఘకాలంపాటు రేడియోధార్మికతకు గురైనా దీనికి ఏమీ కాదు. ఒక్క 5డీ మెమొరీ క్రిస్టల్‌లో 360 టెరాబైట్ల దాకా సమాచారాన్ని దాచవచ్చు’’ అని వారు వివరించారు. సౌతాంప్టన్‌ వర్సిటీ పరిశోధకులు అభివృద్ధి చేసిన ఈ 5డీ మెమొరీ క్రిస్టల్‌.. ‘మోస్ట్‌ డ్యూరబుల్‌ డేటా స్టోరేజ్‌ మెటీరియల్‌’గా 2014లో గిన్నిస్‌ రికార్డు సాధించింది.