American visa interviews : శనివారాల్లోనూ అమెరికా వీసా ఇంటర్వ్యూలు!
ABN, First Publish Date - 2023-01-23T02:58:33+05:30
తొలిసారి అమెరికా వీసా కోసం దరఖాస్తు చేసుకున్న వారికి శుభవార్త. ఇలాంటి వారు వీసా ఇంటర్వ్యూ కోసం నిరీక్షించే సమయాన్ని తగ్గించడానికి భారత్లోని అమెరికా దౌత్య కార్యాలయాలు తొలిసారిగా శనివారం కూడా ఇంటర్వ్యూలు
ఢిల్లీ, హైదరాబాద్, ముంబై, చెన్నై, కోల్కతాల్లోని కాన్సులేట్లలో అదనపు స్లాట్లు
న్యూఢిల్లీ, జనవరి 22: తొలిసారి అమెరికా వీసా కోసం దరఖాస్తు చేసుకున్న వారికి శుభవార్త. ఇలాంటి వారు వీసా ఇంటర్వ్యూ కోసం నిరీక్షించే సమయాన్ని తగ్గించడానికి భారత్లోని అమెరికా దౌత్య కార్యాలయాలు తొలిసారిగా శనివారం కూడా ఇంటర్వ్యూలు చేసే ప్రక్రియను ప్రారంభించాయి. ఈ నెల 21న (శనివారం) ఇలా వీసా ఇంటర్వ్యూలు చేశాయి. వ్యక్తిగతంగా వీసా ఇంటర్వ్యూలకు హాజరయ్యే వారి కోసం ఢిల్లీలోని అమెరికా ఎంబసీ; ముంబై, చెన్నై, కోల్కతా, హైదరాబాద్ల్లోని కాన్సులేట్లు ప్రత్యేకంగా శనివారం కూడా కార్యకలాపాలు కొనసాగించాయి. రాబోయే నెలల్లో కూడా ఎంపిక చేసిన శనివారాల్లో వీసా దరఖాస్తుదారుల కోసం అదనపు స్లాట్లను అందుబాటులోకి తీసుకురానున్నాయి. కొవిడ్-19 కారణంగా వీసాల జారీ ప్రక్రియలో ప్రతిష్టంభన నెలకొనడంతో పాటు వీసాల కోసం నిరీక్షించాల్సిన సమయం భారీగా పెరిగిపోయిన నేపథ్యంలో అమెరికా దౌత్య కార్యాలయాలు ఈ మేరకు పలు చర్యలు చేపడుతున్నాయి.
గతంలో అమెరికా వీసా ఉన్న దరఖాస్తుదారులకు ఇంటర్వ్యూ లేకుండా రిమోట్ ప్రాసెసింగ్ విధానాన్ని అమెరికా విదేశాంగ శాఖ అమలు చేస్తోంది.
అమెరికా ఎంబసీ, కాన్సులేట్లకు శాశ్వత కాన్సులర్ అధికారుల సంఖ్యను పెంచుతూ నిర్ణయం తీసుకుంది. భారత్లో 2.50 లక్షలకు పైగా బీ1/బీ2 అపాయింట్మెంట్లను కేటాయించింది.
వీసాల జారీ ప్రక్రియ సామర్థ్యాన్ని పెంచేందుకు గాను ఈ ఏడాది జనవరి-మార్చి మధ్య కాలంలో వాషింగ్టన్, ఇతర ఎంబసీల నుంచి పదుల సంఖ్యలో కాన్సులర్ అధికారులు భారత్కు రానున్నారు.
అదనపు అపాయింట్మెంట్ల కోసం ముంబై కాన్సులేట్ జనరల్ వారంలో పనిగంటల సంఖ్యను పెంచింది. ఈ వేసవికల్లా భారత్లోని అమెరికా దౌత్య కార్యాలయాల్లో అదనపు సిబ్బంది సాయంతో వీసాల జారీ ప్రక్రియ.. కొవిడ్ సంక్షోభానికి పూర్వ స్థితికి చేరుకుంటుందని అమెరికా అధికార వర్గాలు తెలిపాయి.
Updated Date - 2023-01-23T02:58:34+05:30 IST