ఉద్యానశాఖ కార్యాలయం ఎక్కడ?
ABN, First Publish Date - 2023-09-03T00:26:25+05:30
ఉద్యానశాఖ కార్యాలయం ఎక్కడ?
- భవనం శిథిలావస్థకు చేరడంతో మూసివేత
- సాంకేతిక సలహాలు అందక రైతుల అవస్థలు
చింతపల్లి, సెప్టెంబరు 2:
సబ్ డివిజన్ కేంద్రంలో ఉద్యానశాఖ కార్యాలయం ఎక్కడ ఉందో తెలియక సాంకేతిక సేవలు పొందేందుకు పలువురు ఇబ్బంది పడుతున్నారు. చింతపల్లి, జీకేవీధి, కొయ్యూరు మండలాలకు సంబంధించి ఉద్యాన పంటలకు అవసరమైన సాంకేతిక సేవలందించేందుకు చింతపల్లిలో ఉద్యానశాఖ అధికారిని నాలుగేళ్ల కిందట నియమించారు. ఉద్యానశాఖ కార్యాలయంగా ఆర్ అండ్ బీ కార్యాలయానికి ఎదురుగా ఉన్న పట్టు పరిశ్రమలోని ఓ భవనాన్ని కేటాయించారు. కొంత కాలం ఈ కార్యాలయం నుంచి ఉద్యానశాఖ అధికారులు సేవలందించారు. ప్రస్తుతం ఈ భవనం పూర్తిగా శిథిలావస్థకు చేరుకున్నది. దీంతో సబ్ డివిజన్ కేంద్రంలో ఉద్యానశాఖకు ప్రత్యేక కార్యాలయం లేదు. మూడు మండలాలకు సంబంధించిన ఉద్యానశాఖ అధికారి చింతపల్లిలో ఉన్నప్పటికి రైతులకు సాంకేతిక సేవలు అందడంలేదు. ప్రస్తుతం ఉద్యానశాఖ అధికారి ఎక్కడ ఉంటారో? ఉద్యానశాఖ కార్యాలయం ఎక్కడ నిర్వహిస్తున్నారో ఆదివాసీ రైతులకు తెలియని పరిస్థితి ఎదురైంది. దీంతో మెజారిటీ రైతులు ఉద్యాన పంటల సాగులో అవసరమైన సాంకేతిక సలహాలు, సూచనల కోసం డిగ్రీ కళాశాలలో ఉన్న ఉద్యాన పరిశోధన స్థానానికి వెళ్లి నేరుగా శాస్త్రవేత్తను కలుస్తున్నారు. ఇప్పటికైనా జిల్లా కలెక్టర్, ఐటీడీఏ పీవో స్పందించి ఉద్యానశాఖకు ఒక కార్యాలయాన్ని కేటాయించి, ఉద్యానశాఖ అధికారి సేవలను రైతులకు అందుబాటులోకి తీసుకు రావాలని పలువురు కోరుతున్నారు.
Updated Date - 2023-09-03T00:26:32+05:30 IST