నేటి నుంచి గుణదల ఉత్సవాలు
ABN, First Publish Date - 2023-02-09T00:56:03+05:30
99వ గుణదల మేరీమాత ఉత్సవాలు గురువారం నుంచి ప్రారంభంకానున్నాయి. ఉదయం 7 గంటలకు సమష్టి దివ్యపూజాబలితో మొదలయ్యే వేడుకలు మూడు రోజుల పాటు జరుగుతాయి.
ఉత్సవాలకు భారీ ఏర్పాట్లు
భక్తులు అధికంగా వస్తారని అంచనా
బీఆర్టీఎస్ రోడ్డులోనే వాహనాల పార్కింగ్
గుణదల, ఫిబ్రవరి 8 : 99వ గుణదల మేరీమాత ఉత్సవాలు గురువారం నుంచి ప్రారంభంకానున్నాయి. ఉదయం 7 గంటలకు సమష్టి దివ్యపూజాబలితో మొదలయ్యే వేడుకలు మూడు రోజుల పాటు జరుగుతాయి. భక్తులు అధిక సంఖ్యలో వచ్చే అవకాశం ఉండటంతో బిషప్ గ్రాసీ ఉన్నత పాఠశాలలో ప్రత్యేక ఏర్పాట్లు చేశారు. గుణదల కొండను విద్యుత్ దీపాలతో అందంగా అలంకరించారు. కొండ మధ్యభాగంలో తలనీలాలు సమర్పించుకునేందుకు వీలుగా షెల్టర్లు, జల్లుస్నానాలు ఏర్పాటు చేశారు. బిషప్ గ్రాసీ ఉన్నత పాఠశాల ఆవరణలోనే ప్రాథమిక ఆరోగ్య కేంద్రాన్ని సిద్ధం చేశారు. చర్చి, కొండ దిగువన ఉన్న ప్రధాన ఆలయంలో ప్రత్యేక పూజలు చేసి, దీవెనలు అందించేందుకు సిస్టర్లు, ఫాదర్లను నియమించారు. ఇక రాష్ట్రవ్యాప్తంగా వచ్చే భక్తుల కోసం బీఆర్టీఎస్ రోడ్డులో పార్కింగ్ సదుపాయం కల్పించారు.
Updated Date - 2023-02-09T00:56:04+05:30 IST