రోడ్డుపై దీనంగా వృద్ధ దంపతులు.. వారిని చూసిన ఆ చిన్నారి ఏం చేశాడంటే..
ABN, First Publish Date - 2022-04-16T14:18:58+05:30
దయ కలిగిన హృదయంతో చేసే సేవా కార్యక్రమాలు...
దయ కలిగిన హృదయంతో చేసే సేవా కార్యక్రమాలు అందరి హృదయాలను గెలుచుకుంటాయి. అయితే ఇటువంటి పనులను చేసే పిల్లలను చూస్తే ఎంతో ముచ్చటవేస్తుంది. ఇటువంటి ఉదంతానికి సంబంధించిన ఒక ఫోటో సోషల్ మీడియాలో వైరల్‌గా మారింది. ఈ ఫొటోలో ఒక పాఠశాల విద్యార్థి.. ఎండలో ఇబ్బందులు పడుతున్న వృద్ధ దంపతులకు నీరు అందిస్తున్నాడు. హృదయానికి హత్తుకునే ఈ ఫోటోను ఐఏఎస్ అధికారి అవనీష్ శరణ్ తన ట్విట్టర్ హ్యాండిల్‌లో షేర్ చేశారు.
ఈ ఫోటోలో రోడ్డు పక్కన కూర్చున్న వృద్ధ దంపతుల దగ్గరకు వెళ్లిన ఒక పిల్లవాడు తన బాటిల్‌లో నీటిని వారి బాటిల్‌లో నింపుతుండటం కనిపిస్తుంది. చిన్నప్పటి నుంచే పిల్లల్లో మంచి పనులు చేయాలనే ఆలోచన కల్పిస్తే ప్రపంచమే మారిపోతుందనే సందేశాన్ని ఈ ఫొటో అందిస్తోంది. ఈ ఫోటోను షేర్ చేసిన ఐఏఎస్ అధికారి "ద్వేషం నేర్చుకుంటే వస్తుంది. దయ సహజంగా వస్తుంది" అని క్యాప్షన్‌లో రాశారు. ఈ ఫోటోను ఇప్పటి వరకు 23 వేల మందికి పైగా లైక్ చేశారు. అదే సమయంలో ట్విట్టర్ యూజర్స్ ఈ చిన్నారి ప్రవర్తన చూసి ప్రశంసల జల్లు కురిపిస్తున్నారు. ఒక యూజర్.."దయ అనేది ఒక సార్వత్రిక భాష, ఇది చాలా చిన్న వయస్సు నుండి పిల్లలకు నేర్పించాలని రాశాడు. మరొక యూజర్ ఇది"మానవత్వానికి సరైన ఉదాహరణ" అని పేర్కొన్నాడు.
Updated Date - 2022-04-16T14:18:58+05:30 IST