చాణక్య నీతి: ఈ 3 విషయాల్లో అస్సలు సిగ్గుపడకూడదు...
ABN, First Publish Date - 2022-06-23T12:39:32+05:30
ఆచార్య చాణక్యుడు తన చాణక్య నీతి పుస్తకంలో...
ఆచార్య చాణక్యుడు తన చాణక్య నీతి పుస్తకంలో సామాజిక సంక్షేమానికి సంబంధించిన అనేక విధానాలను అందించాడు. ఈ విధానాలను అర్థం చేసుకుని జీవితంలో అనుసరించే వ్యక్తికి చాలా బాధలు సులభంగా దూరమవుతాయని అంటారు. చాణక్య విధానాలు నేటి కాలంలోనూ బాగా ప్రాచుర్యం పొందాయి. ఎవరైనాసరే అస్సలు సిగ్గుపడకూడని మూడు విషయాల గురించి చాణక్యుడు తెలిపాడు.
డబ్బుకు సంబంధించిన విషయాలు
డబ్బుకు సంబంధించిన విషయాలలో ఎప్పుడూ సిగ్గుపడకూడదని చాణక్యుడు చెప్పాడు. ఎందుకంటే ఈ విషయంలో సిగ్గుపడే వ్యక్తి బాధపడాల్సి వస్తుంది. ఉదాహరణకు కొంతమంది ఎవరికైనా డబ్బు ఇచ్చిన తర్వాత దానిని తిరిగి అడగడానికి సిగ్గుపడతారు. అటువంటి వారికి డబ్బు తిరిగి వచ్చే అవకాశాలు తక్కువగా ఉంటాయి. అంతే కాదు ఇలాంటి అలవాట్ల గురించి తెలిస్తే ఎదుటి వ్యక్తి వాటిని సద్వినియోగం చేసుకోవడానికి ప్రయత్నిస్తాడు.
ఆహారం విషయంలో..
చాలా మంది ఇతరుల ముందు ఆహారం తినడానికి సిగ్గుపడతారు. ముఖ్యంగా బంధువుల ఇంటికి వెళ్లినప్పుడు ఇలా జరుగుతుంది. అటువంటి పరిస్థితిలో వారు మొహమాటంతో తమ ఆకలి కంటే తక్కువ ఆహారం తీసుకుంటారు. ఇలా చేయడం వల్ల ఆకలితో మాడిపోతూ తనకి తానే హాని చేసుకుంటాడు.
జ్ఞానాన్ని గ్రహించడంలో...
జ్ఞానం ఎక్కడ దొరికితే అక్కడికి వెళ్లి దానిని గ్రహించాలి. చాలా మంది విద్యార్థులు తమ సందేహాలను అడిగేందుకు ఉపాధ్యాయుల దగ్గర సిగ్గుపడతారు. కొందరు పిల్లలు తమ ప్రశ్నలకు సమాధానాలు తెలుసుకోవడానికి సంకోచించరు. ఉపాధ్యాయుడిని ప్రశ్నించలేని పిల్లల జ్ఞానం అసంపూర్ణంగా ఉంటుంది. అందుకే జ్ఞానాన్ని గ్రహించే విషయంలో అస్సలు సిగ్గుపడకూడదని ఆచార్య చాణక్య తెలిపారు.
Updated Date - 2022-06-23T12:39:32+05:30 IST