చిలుక కోసం యువకుడి ప్రాణం బలి.. దారుణంగా చంపేసి ఎవరికీ దొరక్కుండా స్కెచ్.. చివరకు..
ABN, First Publish Date - 2022-04-15T22:20:19+05:30
చిన్న చిన్న విషయాలకే అతిగా స్పందిస్తున్న కొందరు దారుణాలకు పాల్పడుతున్నారు.
చిన్న చిన్న విషయాలకే అతిగా స్పందిస్తున్న కొందరు దారుణాలకు పాల్పడుతున్నారు. క్షణికావేశంలో తోటి మనుషుల ప్రాణాలు తీస్తున్నారు. చిలుకను దొంగిలించాడనే కారణంతో ఓ యువకుడిని అతి కిరాతకంగా చంపేసిన ఘటన తాజాగా మధ్యప్రదేశ్‌లో వెలుగులోకి వచ్చింది. పోలీసులకు దొరక్కూడదనే కారణంతో మృతదేహాన్ని మాయం చేశారు. చివరకు పోలీసులకు దొరికిపోయి కటకటాల పాలయ్యారు.
మధ్యప్రదేశ్‌లోని రైసెన్ జిల్లా రాణిపురా గ్రామానికి చెందిన అమిత్ అనే యువకుడు ఈ నెల 6వ తేదీన అదృశ్యమయ్యాడు. కుటుంబ సభ్యులు ఎంతగా వెతికినా అమిత్ కనిపించలేదు. దాంతో వారు పోలీసులకు ఫిర్యాదు చేశారు. పోలీసులు కేసు నమోదు చేసుకుని అమిత్ కోసం అన్వేషణ ప్రారంభించారు. ఆ సమయంలో గ్రామ శివారులో అమిత్ మృతదేహం లభ్యమైంది. మృతదేహాన్ని స్వాధీనం చేసుకున్న పోలీసులు పోస్టుమార్టం నిర్వహించారు. అనంతరం హత్య ఎవరు చేసి ఉంటారని దర్యాఫ్తు ప్రారంభించారు. ఈ క్రమంలో గ్రామానికి చెందిన ఓ వ్యక్తి పోలీసులకు కీలక సమాచారం అందించాడు.
అదే గ్రామానికి చెందిన అజయ్, అనిల్‌పై అనుమానం వ్యక్తం చేశాడు. పోలీసులు వారిని అదుపులోకి తీసుకుని విచారించగా అసలు విషయం బయటపడింది. తామే అమిత్‌ను చంపినట్టు వారు అంగీకరించారు. తాము ఇంటి వద్ద ఓ చిలుకను పెంచుకుంటున్నామని, దానిని అమిత్ దొంగిలించాడని వారు పోలీసులకు తెలిపారు. ఈ విషయమై వారిద్దరూ అమిత్‌‌తో గొడవపెట్టుకున్నారు. ఆ గొడవలో ఒక పెద్ద రాయి తీసుకొని అమిత్ తలపై కొట్టడడంతో తీవ్ర గాయమైంది. తీవ్ర రక్తస్రావం జరగడంతో అమిత్ అక్కడికక్కడే మరణించాడు. ఎవరికి దొరకకుండా ఉండేదుకు అమిత్ మృతదేహానికి రాయిని కట్టి నదిలో విసిరేశారు.
Updated Date - 2022-04-15T22:20:19+05:30 IST