Petdog birthday party: భారీ స్థాయిలో శునకం జన్మదిన వేడుకలు.. ఏకంగా 4 వేల మందికి భోజనాలు
ABN, First Publish Date - 2022-06-24T21:46:08+05:30
కర్ణాటకకు చెందిన ఒక వ్యక్తి తన పెంపుడు కుక్కపై ఉన్న ప్రేమను ఘనంగా చాటుకున్నాడు.
కర్ణాటకకు చెందిన ఒక వ్యక్తి తన పెంపుడు కుక్కపై ఉన్న ప్రేమను ఘనంగా చాటుకున్నాడు. ఊరు ఊరంతటినీ భోజనాలకు పిలిచాడు. 100 కేజీల కేక్ కట్ చేశాడు. ఏకంగా 4 వేల మందికి వెజ్, నాన్-వెజ్ కూరలతో భోజనాలు పెట్టాడు. అతిథులు కేక్ తిని, భోజనాలు చేసి శునకానికి జన్మదిన శుభాకాంక్షలు చెప్పి ఇళ్లకు వెళ్లారు. ఇకపోతే, ఈ సెలబ్రేషన్ వెనుక ఓ పొలిటికల్ స్టోరీ ఉండడం విశేషం.
కర్ణాటకలోని శివప్పబెళగావి జిల్లాలోని తుక్కనట్టి గ్రామానికి చెందిన శివప్ప మర్ది ఓ కుక్కను పెంచుకుంటున్నాడు. దానికి `క్రిష్` అని పేరు పెట్టుకున్నాడు. క్రిష్ జన్మదిన వేడుకలను తాజాగా ఘనంగా నిర్వహించాడు. వంద కేజీల కేక్‌ను కట్ చేయించాడు. భారీగా ఖర్చు పెట్టి గ్రామంలోని నాలుగు వేల మందికి వెజ్, నాన్-వెజ్ కూరలతో భోజనాలు పెట్టించాడు. కేక్ కటింగ్ తర్వాత గ్రామంలో ఆ కుక్కను ఊరేగించారు. అయితే క్రిష్ బర్త్ డే పార్టీని శివప్ప ఘనంగా నిర్వహించడం వెనుక చిన్న పొలిటికల్ స్టోరీ ఉందట.
శివప్ప గత 20 ఏళ్లుగా గ్రామ పంచాయతీ సభ్యుడిగా ఉన్నారట. ఇటీవల ఎన్నికైన కొత్త పంచాయతీ సభ్యుడు ఇటీవల ఓ బర్త్ డే పార్టీ ఇచ్చి దానికి పాత పంచాయతీ సభ్యులను కూడా పిలిచాడట. అనంతరం గ్రామస్తులతో.. `మా పార్టీకి పాత పంచాయతీ సభ్యులు కూడా వచ్చి కుక్కల్లా తిన్నార`ని అన్నాడట. ఆ మాటలకు నొచ్చుకున్న శివప్ప తనదైన స్టైల్ రివర్స్ పంచ్ ఇచ్చాడు. తన పెంపుడు కుక్క బర్త్ డే పార్టీని ఘనంగా నిర్వహించి ఊరందరికీ భోజనాలు పెట్టించాడట.
Updated Date - 2022-06-24T21:46:08+05:30 IST