పోలీసుల సీక్రెట్ ఆపరేషన్‌లో ప్రెగ్నెంట్ బాలిక మృతి.. బాధిత కుటుంబానికి రూ.164 కోట్లకు పైగా పరిహారం..
ABN, First Publish Date - 2022-06-28T03:07:17+05:30
పోలీసుల సీక్రెట్ ఆపరేషన్‌లో(Covert operation) ప్రమాదవశాత్తూ కడుపుతో ఉన్న బాలిక మరణించడంతో కాలిఫోర్నియా(California) న్యాయస్థానం బాధిత కుటుంబానికి తాజాగా 21 మిలియన్ డాలర్ల(సుమారు రూ.164 కోట్లు) పరిహారం ప్రకటించింది.
ఎన్నారై డెస్క్: పోలీసుల సీక్రెట్ ఆపరేషన్‌లో(Covert operation) ప్రమాదవశాత్తూ కడుపుతో ఉన్న టీనేజర్ మరణించడంతో కాలిఫోర్నియా(California) న్యాయస్థానం బాధిత కుటుంబానికి తాజాగా 21 మిలియన్ డాలర్ల(సుమారు రూ.164 కోట్లు) పరిహారం ప్రకటించింది. 2018లో ఈ దారుణం జరగ్గా బాధిత కుటుంబం కోర్టును ఆశ్రయించడంతో వారికి ఊరట దక్కింది. బాధితుల కథనం ప్రకారం.. ఓ కేసులో నిందితుడిగా ఉన్న రికో టైగర్‌ను(Rico tiger) పట్టుకునేందుకు ఫ్రీమోంట్(Fremont) పోలీసులు ఓ సీక్రెట్ ఆపరేషన్ ప్లాన్ చేశారు. ఇందులో భాగంగా వారు ఓ రోజు రీకో నడుపుతున్న టాక్సీని అడ్డగించారు. ఆ సమయంలో.. 16 ఏళ్ల బాలిక ఎలీనా మోండ్రాగన్(Elena mondragon) కారులో ప్రయాణిస్తోంది. అప్పటికి ఆమె మూడు నెలల గర్భవతి.
కాగా.. పోలీసులను చూసిన వెంటనే రికో కారులోంచి దిగి పారిపోయేందుకు ప్రయత్నించాడు. ఈ క్రమంలో మఫ్టీలో ఉన్న ఓ పోలీసు ఆఫీసర్ ఆటోమేటిక్ తుపాకీతో(AR-15) అతడి వైపు కాల్పులు జరిపాడు. దురదృష్టవశాత్తూ.. కారులోని ఎలీనాకు తూటాలు తగలడంతో ఆమె మృతి చెందింది. అయితే.. ఈ కాల్పులకు పరోక్షంగా కారణమైన టైగర్‌పై పోలీసులు ప్రొవొకేషన్ చట్టం కింద కేసు నమోదు చేశారు. ఇటువంటి సందర్భాల్లో పోలీసులు బాధిత కుటుంబానికీ ఎంతోకొంత పరిహారాన్ని చెల్లిస్తుంటారు. కానీ ఈ ఘటనలో బాధిత కుటుంబానికీ న్యాయం చేయకుండా నిర్లక్ష్యం చేశారు. దీంతో వారు కోర్టును ఆశ్రయించారు. బాలిక అనామకురాలని, ఆమెది సామాన్య నేపథ్యమనే ధీమాతో పోలీసులు నిర్లక్ష్యం ప్రదర్శించారంటూ బాధితుల తరుపు న్యాయవాది కోర్టులో వాదించారు. కాగా.. ఈ కేసులో రెండేళ్ల పాటు విచారణ జరగ్గా ఇటీవలే బాధితులకు అనుకూలంగా తీర్పు వెలువడింది. 21 మిలియన్ డాలర్ల పరిహారాన్ని పోలీసు శాఖ, స్థానిక ప్రభుత్వం, నిందితుడు రికో టైగర్ చెల్లించాలని న్యాయస్థానం తీర్పు వెలువరించింది.
Updated Date - 2022-06-28T03:07:17+05:30 IST