బయటికి వచ్చిన జిన్‌పింగ్‌!
ABN, First Publish Date - 2022-09-28T07:29:59+05:30
తాను గృహనిర్బంధంలో ఉన్నానంటూ వచ్చిన వార్తలకు చెక్‌ పెడుతూ చైనా అధ్యక్షుడు షి జిన్‌పింగ్‌ మంగళవారం తొలిసారిగా బయటకు వచ్చారు.
ఉజ్బెకిస్థాన్‌ పర్యటన అనంతరం తొలిసారి ప్రజలకు బయట కనిపించిన చైనా అధ్యక్షుడు
బీజింగ్‌, సెప్టెంబరు 27: తాను గృహనిర్బంధంలో ఉన్నానంటూ వచ్చిన వార్తలకు చెక్‌ పెడుతూ చైనా అధ్యక్షుడు షి జిన్‌పింగ్‌ మంగళవారం తొలిసారిగా బయటకు వచ్చారు. బీజింగ్‌లో జరిగిన ఒక ప్రదర్శనకు ఆయన హాజరయ్యారని ప్రభుత్వ అధికారిక మీడియా ఈ మేరకు వెల్లడించింది. గడచిన దశాబ్దకాలంగా చైనా సాధించిన ప్రగతిని చూపించేలా రూపొందించిన ఈ ప్రదర్శనను జిన్‌పింగ్‌ మాస్క్‌ ధరించి ప్రత్యక్షంగా హాజరై తిలకించారని స్పష్టం చేసింది. 2020లో ప్రపంచంపై కొవిడ్‌ విరుచుకుపడినప్పటి నుంచీ దేశాన్ని వీడని జిన్‌పింగ్‌, ఈ నెల 16న ఉజ్బెకిస్థాన్‌లో జరిగిన శిఖరాగ్ర సమావేశంలో పాల్గొన్నారు. ఆ తర్వాత మళ్లీ బయటకి రాకపోవడంతో అప్పటికే ఉన్న గృహనిర్బంధం వార్తలు ఊపందుకున్నాయి. ఈ నేపథ్యంలో తాజా ప్రదర్శనకు ఆయన హాజరై అన్ని వదంతులకు చెక్‌ పెట్టినట్లైంది. చైనాలో మావో తర్వాత ఆ స్థాయికి చేరుకున్న వ్యక్తి జిన్‌పింగ్‌ మాత్రమే. ఈ నేపథ్యంలో ఆయన దేశాధ్యక్షుడిగా తన హోదాను శాశ్వతం చేసుకునే దిశగా పావులు కదుపుతున్నారు. వచ్చే ఏడాది చైనా కమ్యూనిస్టు పార్టీ (సీపీసీ) సమావేశాల్లో జిన్‌పింగ్‌ను మూడోసారి అధ్యక్షుడిగా ఎన్నుకునే అవకాశం ఉందని అంతర్జాతీయ పరిశీలకులు చెబుతున్నారు.
Updated Date - 2022-09-28T07:29:59+05:30 IST