ద్వేషం నింపేందుకే ద కాశ్మీర్ ఫైల్స్‌కు ప్రచారం: ఫరూక్ అబ్దుల్లా
ABN, First Publish Date - 2022-03-22T19:55:41+05:30
ప్రజల్లో తమపై మరింత ద్వేషం నింపేందుకే కాశ్మీర్ ఫైల్స్ చిత్రానికి ప్రచారం కల్పిస్తున్నారని జమ్మూ కాశ్మీర్ మాజీ ముఖ్యమంత్రి ఫరూక్ అబ్దుల్లా విమర్శించారు. మంగళవారం ఆయన మీడియాతో మాట్లాడుతూ కాశ్మీర్ ఫైల్స్ చిత్రంపై, బీజేపీపై విమర్శలు గుప్పించారు.
ప్రజల్లో తమపై మరింత ద్వేషం నింపేందుకే ద కాశ్మీర్ ఫైల్స్ చిత్రానికి ప్రచారం కల్పిస్తున్నారని జమ్మూ కాశ్మీర్ మాజీ ముఖ్యమంత్రి ఫరూక్ అబ్దుల్లా విమర్శించారు. మంగళవారం ఆయన మీడియాతో మాట్లాడుతూ ద కాశ్మీర్ ఫైల్స్ చిత్రంపై, బీజేపీపై విమర్శలు గుప్పించారు. ఒక దురుద్దేశంతోనే ఈ చిత్రాన్ని రూపొందించారని అన్నారు. ‘‘బీజేపీ పాలిత రాష్ట్రాలు కావాలనే ద కాశ్మీర్ ఫైల్స్ చిత్రానికి రాయితీలు ప్రకటిస్తూ, ప్రచారం కల్పిస్తున్నాయి. ప్రజలతోపాటు, సైనికులు, పోలీసులు తప్పనిసరిగా ఈ చిత్రాన్ని చూడాలని చెబుతున్నాయి. దీని ద్వారా ప్రజల్లో మాపై మరింత ద్వేషం పెంచాలనుకుంటున్నాయి. 1990 నాటి సంఘటనల్లో హిందువులు, ముస్లింలు అందరూ ఇబ్బందిపడ్డారు. దీని గురించి తలచుకుంటే ఇప్పటికీ నా గుండె బరువెక్కుతుంది. ఈ ఘటనల వెనుక రాజకీయ పార్టీల దురుద్దేశాలున్నాయి. అప్పట్లో జర్మనీలో హిట్లర్, గోబెల్స్ పెంచుకున్న ద్వేషం వల్ల లక్షల మంది యూదులు మూల్యం చెల్లించుకోవాల్సి వచ్చింది. ఇప్పుడు ఇండియాలో జరుగుతున్న ప్రచారం వల్ల ఇంకెంతమందికి ఆ పరిస్థితి వస్తుందో’’ అని ఫరూక్ వ్యాఖ్యానించారు. 1990లో కాశ్మీర్‌లో పండిట్లపైనే కాకుండా ముస్లింలు, సిక్కులకు కూడా ఏం జరిగిందో తెలుసుకునేందుకు ఒక నిజ నిర్ధరణ కమిషన్ వేయాలని ప్రభుత్వానికి సూచించారు.
Updated Date - 2022-03-22T19:55:41+05:30 IST