వైసీపీ నేత.. భూమేత
ABN, First Publish Date - 2022-09-21T05:38:24+05:30
ఆయన వైసీపీ నేత. ప్రజాప్రతినిధి కూడా. అధికారం అండగా పశువుల మేత భూమి సొంతం చేసుకున్నారు.
పశువుల మేత భూమిని ఆక్రమించి మామిడి మొక్కలు నాటిన వైనం
పాలసముద్రం, సెప్టెంబరు 20: ఆయన వైసీపీ నేత. ప్రజాప్రతినిధి కూడా. అధికారం అండగా పశువుల మేత భూమి సొంతం చేసుకున్నారు. గ్రామస్థులు ఫిర్యాదు చేసినా అధికారులు పట్టించుకోవడంలేదు. వివరాలిలా ఉన్నాయి. పాలసముద్రం మండలం ఆముదాలలోని జిల్లాపరిషత్‌ ఉన్నతపాఠశాల ప్రహరీ ఆనుకొని ప్రభుత్వ భూమి ఉంది. ఆ భూమిలో ఆముదాల, జయలక్ష్మీపురం కొత్తకండిగ గ్రామస్థులు ఆవులు మేపుకునేవారు. ఈ భూమిపై కన్నేసిన ఆముదాల పంచాయతీకి చెందిన ఓ ప్రజాప్రతినిధి సుమారు నాలుగున్నర ఎకరాల ప్రభుత్వభూమిని చదును చేశారు. అందులో సుమారు 400 మామిడి మొక్కలు నాటించారు. మండలంలో భూముల ధరలు ఆకాశాన్ని అంటుతుండటంతో అధికారం ఉండగానే ఇల్లు చక్కదిద్దుకోవాలనే ఉద్దేశంతో ఆయన తన పలుకుబడిని ఉపయోగించి ఈ భూమిని ఆక్రమించుకున్నారు. దీనిపై గ్రామస్థులు ఆ ప్రజాప్రతినిధిని అడిగితే.. సమాధానం లేదు. దీంతో కలెక్టర్‌ ఎం.హరినారాయణన్‌కు, నగరి ఆర్డీవో సుజనకు, తహసీల్దార్‌ బాబుకు అర్జీల ద్వారా ఫిర్యాదు చేశారు. ఇంతవరకు వారి ననుంచి ఎలాంటి చర్యలు లేవు. ఈ భూమి చదునుచేసి, మొక్కలు నాటి 20 రోజులు గడుస్తున్నా అటువైపు రెవెన్యూ అధికారులు కన్నెత్తైనా చూడడం లేదని గ్రామస్థులు ఆరోపిస్తున్నారు. ఇప్పటికైనా ఉన్నతాధికారులు స్పందించి ప్రభుత్వ భూమి ఆక్రమణలకు గురికాకుండా చూడాలని కోరుతున్నారు.
Updated Date - 2022-09-21T05:38:24+05:30 IST