ఆకలి తీర్చే ఆపిల్‌ ఫ్రిడ్జ్‌
ABN, First Publish Date - 2022-01-25T06:37:55+05:30
తిరుపతిలో ఆకలేసినవారు ఇకపై ఎవరి ఇంటి ముందుకో వెళ్లి ఆహారాన్ని అడుక్కోవాల్సిన అవసరం లేదు.
‘ఫీడ్‌ ది నీడ్‌’ పేరుతో తిరుపతి రైల్వేస్టేషన్‌ వద్ద ఏర్పాటు
తిరుపతి, జనవరి 24 (ఆంధ్రజ్యోతి): తిరుపతిలో ఆకలేసినవారు ఇకపై ఎవరి ఇంటి ముందుకో వెళ్లి ఆహారాన్ని అడుక్కోవాల్సిన అవసరం లేదు. ఆపిల్‌ ఫ్రిడ్జ్‌ డోరు తీస్తే చాలు.. ఆహారం ఉచితంగా దొరుకుతుంది. అవును ఇది నిజమే.. ఒకరికి ఎక్కువైన ఆహారం మకొకరి ఆకలి తీరుస్తుందన్న ఆలోచనతో హైదరాబాద్‌కు చెందిన డాక్టర్‌ నీలిమ ఆర్య.. ‘ఫీడ్‌ ది నీడ్‌’ పేరుతో ఈ ఆపిల్‌ ఫ్రిడ్జ్‌కి రూపకల్పన చేశారు. ప్రస్తుతం ఈ ఫ్రిడ్జిని తిరుపతి రైల్వేస్టేషన్‌ దగ్గర ఏర్పాటు చేశారు. స్థానిక దాతల సహకారంతో సేవలందిస్తున్నారు. ఎదుటివారి ఆకలి తీర్చాలన్న ఆలోచన ఉన్నవారంతా దీన్ని సద్వినియోగం చేసుకోవచ్చు.
ఏం చేయాలంటే..
ఇంట్లో అందరూ తినగా మిగిలిన ఆహారం (అన్నం, పండ్లు వంటివి) లేదా ఫంక్షన్లలో మిగిలిపోయిన ఆహారాన్ని ఒకరిద్దరికి సరిపోయేలా ప్యాక్‌ చేసి తీసుకొచ్చి ఇక్కడి ఫ్రిడ్జిలో పెట్టొచ్చు. శాఖాహారం, మాంసాహారాన్ని వాటికి కేటాయించిన అరల్లో ఉంచాలి. పాడైపోయింది కాకుండా తినగలిగే ఆహారాన్నే ప్యాకింగ్‌ చేయాలి. ఈ కేంద్రం వద్ద ఇద్దరు వలంటీర్లు అందుబాటులో ఉంటారు.
Updated Date - 2022-01-25T06:37:55+05:30 IST