బాయ్‌ఫ్రెండ్‌తో పారిపోయిన వధువు
ABN, First Publish Date - 2021-02-19T13:28:46+05:30
వధువు పారిపోవడంతో...వరుడు దిక్కులేక వధువు చెల్లెలైన మైనర్ బాలికను పెళ్లాడిన వింత ఘటన...
వధువు మైనర్ చెల్లిని పెళ్లాడిన వరుడు
భవానీపట్న(ఒడిశా): వధువు పారిపోవడంతో...వరుడు దిక్కులేక వధువు చెల్లెలైన మైనర్ బాలికను పెళ్లాడిన వింత ఘటన ఒడిశా రాష్ట్రంలోని కలహండీ జిల్లాలో వెలుగుచూసింది. జైపట్న పోలీసుస్టేషను పరిధిలోని మాల్పాడా గ్రామానికి చెందిన వధువు 26 ఏళ్ల వయసున్న వరుడితో వివాహం చేసుకోవాల్సి ఉంది. మరికొద్దిసేపట్లో పెళ్లి అనగా వధువు తన ప్రియుడితో కలిసి పారిపోయింది.అంతే వధువు చెల్లెలైన 15 ఏళ్ల వయసున్న మైనర్ బాలికకు నచ్చచెప్పి ఆమెను వరుడికిచ్చి పెళ్లి జరిపించేశారు.వధువు పారిపోవడంతో నివ్వెర పోయిన వరుడు అదే ముహూర్తంలో వధువు చెల్లైలైన మైనర్ బాలిక మెడలో తాళి కట్టేశాడు.పెళ్లి అనంతరం అత్తవారింటికి వెళ్లిన 15 ఏళ్ల బాలికా వధువును కలహండి జిల్లా పిల్లల రక్షణ అధికారి సుకాంతి బెహెరా రక్షించారు.
బాల్యవివాహం చట్టవిరుద్ధమని వధువు, వరుడి కుటుంబసభ్యులకు తెలియదని సుకాంతి చెప్పారు. 10వతరగతి పరీక్షలకు సిద్ధమవుతున్న బాలికా వధువును రక్షించి పుట్టింటికి చేర్చామని, బాలిక తన పుట్టింటి నుంచి పరీక్షకు హాజరుకావాలని సూచించారు. రెండు కుటుంబాల వారికి కౌన్సెలింగ్ చేసి బాలికకు 18 ఏళ్ల వయసు వచ్చే దాకా అత్తింటికి పంపించవద్దని చెప్పడంతో వారు అంగీకరించారని బెహెరా చెప్పారు. తన కుమార్తె అయిన వధువు పారిపోవడంతో చిన్న కూతుర్ని వరుడి కుటుంబం ఒత్తిడి కారణంగా ఇచ్చి పెళ్లి చేశానని బాలిక వధువు తండ్రి చెప్పడం కొసమెరుపు.
Updated Date - 2021-02-19T13:28:46+05:30 IST