హెచ్-1బీ వీసా కోసం ఎదురుచూస్తున్న వారికి తీపి క‌బురు!
ABN, First Publish Date - 2021-06-25T17:37:19+05:30
హెచ్-1బీ వీసా కోసం ఎదురుచూస్తున్న విదేశీ గెస్ట్ వర్కర్ల‌కు యూఎస్ సిటిజెన్షిప్ అండ్ ఇమిగ్రేషన్ సర్వీసెస్(యూఎస్సీఐఎస్) తీపి క‌బురు అందించింది.
వాషింగ్ట‌న్‌: హెచ్-1బీ వీసా కోసం ఎదురుచూస్తున్న విదేశీ గెస్ట్ వర్కర్ల‌కు యూఎస్ సిటిజెన్షిప్ అండ్ ఇమిగ్రేషన్ సర్వీసెస్(యూఎస్సీఐఎస్) తీపి క‌బురు అందించింది. తిరస్క‌ర‌ణ‌కు గురైన వీరి వీసా అప్లికేష‌న్ల‌ను తిరిగి దరఖాస్తు చేసుకునేందుకు అవ‌కాశం ఇచ్చింది. యూఎస్సీఐఎస్ తీసుకున్న ఈ నిర్ణ‌యంతో అమెరికాలో ఉద్యోగం చేయాల‌నుకునే భార‌త ఐటీ నిపుణుల‌కు మ‌రో అవ‌కాశం ద‌క్కిన‌ట్లైంది. అయితే, ఈ అవ‌కాశం 2020 అక్టోబర్1 తర్వాత వీసా కోసం దరఖాస్తు చేసుకున్న వారికి మాత్ర‌మే. వీరు మళ్లీ దరఖాస్తు చేసుకుంటే పరిగణలోకి తీసుకుంటామని యూఎస్సీఐఎస్ అధికారులు వెల్ల‌డించారు. అలాగే దరఖాస్తు చేసుకునేందుకు 2021, అక్టోబర్ 1 వ‌ర‌కు గ‌డువు ఇచ్చింది. ఇక అగ్ర‌రాజ్యంలో ఉద్యోగం చేసుకునేందుకు వీలు కల్పించే హెచ్-1బీ వీసా ద్వారా ప్ర‌తి ఏటా అక్క‌డి ఐటీ కంపెనీలు వేల సంఖ్యలో విదేశీ నిపుణుల‌ను నియ‌మించుకుంటున్నాయి. వీరిలో అధికంగా భారతీయులు, చైనీయులు ఉంటున్నారు.
Updated Date - 2021-06-25T17:37:19+05:30 IST