మరో భారీ బిల్లుకు అమెరికన్ సెనేట్ ఆమోదం!
ABN, First Publish Date - 2021-07-30T19:43:23+05:30
అగ్రరాజ్యం అమెరికాలో మౌలిక సదుపాయాల కోసం మరో భారీ బిల్లుకు సెనేట్ ఆమోదం తెలిపింది.
వాషింగ్టన్‌: అగ్రరాజ్యం అమెరికాలో మౌలిక సదుపాయాల కోసం మరో భారీ బిల్లుకు సెనేట్ ఆమోదం తెలిపింది. 1 ట్రిలియన్‌ డాలర్ల (సుమారు రూ.75 లక్షల కోట్లు) విలువైన ద్వైపాక్షిక మౌలిక సదుపాయాల బిల్లును సెనేట్ ప్రాథమికంగా ఆమోదించింది. బుధవారం సెనేట్‌లో జరిగిన ఓటింగ్‌లో 67-32 ఓట్ల తేడాతో బిల్లు ఆమోదం పొందింది. ఈ ఓటింగ్‌లో 17 మంది రిపబ్లికన్ సెనేటర్లు బిల్లుకు మద్దతుగా ఓటు వేశారు. నిధుల వ్యయానికి సంబంధించి కొన్ని నిబంధనలను సవరించేందుకు జో బైడెన్ సర్కార్ అంగీకరించడంతో బిల్లు సెనేట్‌లో ప్రాథమికంగా గట్టేక్కింది. అయితే, సెనేట్‌లో రిపబ్లికన్, డెమొక్రాట్ల బలం సమంగా(50-50) ఉన్న విషయం తెలిసిందే.
తాజా బిల్లు తుది ఆమోదం పొందాలంటే కనీసం 60 మంది సభ్యులు మద్దతుగా ఓటు వేయాల్సి ఉంటుంది. కానీ, తుది ఆమోదం విషయంలో రిపబ్లికన్లు ఎంతమేరకు సహకరిస్తారనేది ప్రస్తుతం మిలియన్ డాలర్ల ప్రశ్న. ఈ భారీ బిల్లు అమలైతే మాత్రం అగ్రరాజ్యంలో దశాబ్ద కాలం పాటు యేటా 20 లక్షల కొత్త ఉద్యోగాలు సృష్టించే వీలు ఉంటుంది. ఈ ప్రణాళికను అధ్యక్షుడు జో బైడెన్ దాదాపు ఒక శతాబ్ద కాలంలో మౌలిక వసతుల కల్పన కోసం ముఖ్యమైన దీర్ఘకాలిక పెట్టుబడిగా పేర్కొన్నారు. అమెరికన్ల భవిష్యత్‌కు ఇది చాలా ఉపయోగకరంగా ఉంటుందని అన్నారు.
Updated Date - 2021-07-30T19:43:23+05:30 IST