కొత్త ప్రైవసీ పాలసీని వాయిదా వేయలేం: వాట్సాప్
ABN, First Publish Date - 2021-05-17T23:02:05+05:30
తమ కొత్త ప్రైవసీ పాలసీ విధానాన్ని వాయిదా వేయలేమని మొబైల్ మెసేజింగ్ యాప్ వాట్సాప్ ఈ రోజు (సోమవారం) ఢిల్లీ హైకోర్టు వేదికగా స్పష్టం చేసింది.
తమ కొత్త ప్రైవసీ పాలసీ విధానాన్ని వాయిదా వేయలేమని మొబైల్ మెసేజింగ్ యాప్ వాట్సాప్ ఈ రోజు (సోమవారం) ఢిల్లీ హైకోర్టు వేదికగా స్పష్టం చేసింది. సీనియర్ న్యాయవాది కపిల్ సిబల్ వాట్సాప్ తరఫున ఢిల్లీ హైకోర్టులో సోమవారం వాదనలు వినిపించారు. తమ కొత్త ప్రైవసీ పాలసీ విధానాన్ని అంగీకరించని వారి ఖాతాలను దశల వారీగా తొలగిస్తామని తెలిపారు. ఈ విధానాన్ని వాయిదా వేయడం కుదరదని స్పష్టం చేశారు.
`మా నూతన పాలసీ ఐటీ నిబంధనలను అతిక్రమించడం లేదు. మేము పూర్తిగా నిబందనల ప్రకారమే వెళ్తున్నామ`ని సిబల్ కోర్టుకు చెప్పారు. ఈ కొత్త విధానం ఇన్ఫర్మేషన్ టెక్నాలజీ యాక్ట్(2000) లోని కొన్ని నిబంధనలను ఉల్లంఘిస్తుందనే ఆందోళనలు వినిపిస్తున్నాయని కేంద్ర ప్రభుత్వం తరఫున వాదనలు వినిపిస్తున్న అడిషనల్ సొలిసిటర్ జనరల్ చేతన్ శర్మ కోర్టుకు చెప్పారు. ఈ కొత్త పాలసీపై వాట్సాప్ ఉన్నతాధికారులకు కేంద్రం లేఖ రాసిందని, సమాధానం కోసం వేచిచూస్తున్నామని తెలిపారు. కాగా, వాట్సాప్ యథాతధ స్థితిని కొనసాగించాలని చేతన్ శర్మ, పిటీషనర్లు కోరగా.. హైకోర్టు నిరాకరించి విచారణను జూన్ 3కి వాయిదా వేసింది.
Updated Date - 2021-05-17T23:02:05+05:30 IST