అమృల్లా సలే వీడియోను రికార్డును చేసిన చోటే.. తాలిబన్ ఫైటర్ పోజు, సోషల్ మీడియాలో వైరల్
ABN, First Publish Date - 2021-09-11T23:08:17+05:30
బుక్‌షెల్ఫ్ ముందు తుపాకితో ఫొటో దిగిన తాలిబన్ ఫైటర్ ఫొటో ఒకటి సోషల్ మీడియాలో వైరల్ అవుతోంది. కారణం.. అదే ఫొటో ముందు
పంజ్‌షీర్: బుక్‌షెల్ఫ్ ముందు తుపాకితో కూర్చున్న తాలిబన్ ఫైటర్ ఫొటో ఒకటి సోషల్ మీడియాలో వైరల్ అవుతోంది. కారణం.. అదే బుక్‌షెల్ఫ్ ముందు అంతకముందు ఆఫ్ఘనిస్థాన్ మాజీ ఉపాధ్యక్షుడు అమృల్లా సలే ఓ వీడియోను రికార్డు చేయడమే. పంజ్‌షీర్ వ్యాలీలో జరిగిన ఘర్షణల్లో అమృల్లా సలే సోదరుడు రోహుల్లా సలే‌ను తాలిబన్లు హతమార్చిన తర్వాత ఈ ఫొటో వెలుగులోకి వచ్చింది.
తాలిబన్ అనుకూల ట్విట్టర్ ఖాతాల్లో ఈ ఫొటో విపరీతంగా తిరుగుతోంది. తుపాకి పట్టుకున్న తాలిబన్ బుక్‌షెల్ఫ్ ముందు దర్జాగా కూర్చున్నట్టుగా ఆ ఫొటో ఉంది. తాలిబన్లతో జరిగిన ఘర్షణల్లో రోహుల్లా సలే మరణించినట్టు పలు నివేదికలు ధ్రువీకరించాయి కూడా. కాగా, ప్రస్తుతం తాలిబన్ ఫొటో దిగిన ప్రాంతం నుంచే ఇటీవల ఓ వీడియో సందేశాన్ని పంపిన అమృల్లా సలే.. తాను దేశాన్ని వీడిపోబోనని స్పష్టం చేశారు. పంజ్‌షీర్‌లో తాలిబన్లను ఎదురొడ్డుతామని తెలిపారు.
పంజ్‌షీర్ ప్రావిన్స్‌ను తాము స్వాధీనం చేసుకున్నట్టు తాలిబన్లు ప్రకటించిన తర్వాత అమృల్లా సలే దేశాన్ని విడిచిపెట్టి పారిపోయినట్టు వార్తలు వచ్చాయి. అయితే, ఈ వార్తల్లో ఎంతమాత్రమూ నిజం లేదని అన్నారు. అంతేకాదు, పంజ్‌షీర్‌ను స్వాధీనం చేసుకున్నామన్న తాలిబన్ల ప్రకటనను నేషనల్ రెసిస్టెన్స్ ఫ్రంట్ (ఎన్ఆర్ఎఫ్) ఫైటర్లు కూడా ఖండించారు.
Updated Date - 2021-09-11T23:08:17+05:30 IST