ఒలింపిక్ మెడలిస్ట్ లవ్లీనాపై వరాల జల్లు
ABN, First Publish Date - 2021-08-12T22:41:00+05:30
టోక్యో ఒలింపిక్స్‌లో కాంస్య పతక విజేత బాక్సర్ లవ్లీనా బోర్గోహాయిన్‌కు
గువాహటి : టోక్యో ఒలింపిక్స్‌లో కాంస్య పతక విజేత బాక్సర్ లవ్లీనా బోర్గోహాయిన్‌కు అస్సాం ముఖ్యమంత్రి హిమంత బిశ్వ శర్మ అనేక వరాలు ప్రకటించారు. డీఎస్‌పీ ఉద్యోగం ఇవ్వడంతోపాటు గువాహటిలోని ఓ రోడ్డుకు ఆమె పేరు పెడతామని చెప్పారు. ఆమె స్వస్థలం గోలాఘాట్‌లో ఓ స్టేడియాన్ని నిర్మించి, ఆమె పేరు పెడతామన్నారు. ఆమెకు శిక్షణ ఇచ్చిన కోచ్‌కు రూ.10 లక్షలు చెల్లిస్తామన్నారు.
లవ్లీనాకు గువాహటి విమానాశ్రయంలో హిమంత బిశ్వ శర్మ గురువారం స్వాగతం పలికారు. శర్మ ఇచ్చిన ట్వీట్‌లో, తాను ఎంతో గర్వంతో, ఆనందంతో స్టార్ ఒలింపియన్ మెడలిస్ట్ లవ్లీనా బోర్గోహాయిన్‌కు స్వాగతం పలికానని తెలిపారు. ఆమె ఒలింపిక్స్‌లో విజయం సాధించి, లక్షలాది మంది కలలను ప్రేరేపించారని పేర్కొన్నారు. క్రీడా రంగంలోని గ్రామీణ ప్రతిభావంతులకు ఆమె ఉదాహరణగా నిలిచారన్నారు. ప్రపంచ వేదికపై భారీ విజయాలు సాధించాలన్న ఆకాంక్షలను ఏర్పరచుకోవడానికి స్ఫూర్తిగా నిలిచారని తెలిపారు.
Updated Date - 2021-08-12T22:41:00+05:30 IST