లామా, అల్‌పాకస్‌ యాంటీబాడీలతో కరోనాకు చెక్‌!
ABN, First Publish Date - 2021-01-14T07:21:26+05:30
చూడటానికి ఒంటెల్లా కనిపించే లామా, అల్‌పాకస్‌ జంతువుల నుంచి సేకరించిన యాంటీబాడీలతో కరోనా వైర్‌సకు చెక్‌ పెట్టొచ్చని జర్మనీలోని బాన్‌ యూనివర్సిటీ శాస్త్రవేత్తలు
న్యూఢిల్లీ, జనవరి 13 : చూడటానికి ఒంటెల్లా కనిపించే లామా, అల్‌పాకస్‌ జంతువుల నుంచి సేకరించిన యాంటీబాడీలతో కరోనా వైర్‌సకు చెక్‌ పెట్టొచ్చని జర్మనీలోని బాన్‌ యూనివర్సిటీ శాస్త్రవేత్తలు అంటున్నారు. వాటిని ఉపయోగించి వైర్‌సలోని వివిధ భాగాలపై దాడి చేయగల ప్రభావవంతమైన మాలిక్యూల్స్‌ను అభివృద్ధి చేసినట్లు వారు వెల్లడించారు. అధ్యయనంలో భాగంగా లామా, అల్‌పాక్‌సలలోకి కరోనా వైరస్‌ స్పైక్‌ ప్రొటీన్‌ను ఇంజెక్ట్‌ చేయగా, వాటి రోగ నిరోధక వ్యవస్థ వైర్‌సను తిప్పికొట్టే యాంటీబాడీలను విడుదల చేసినట్లు తెలిపారు. ఇది జరిగిన కొన్ని వారాల తర్వాత ఆ జంతువుల రక్త నమూనాలను సేకరించి విశ్లేషించి, కరోనా వ్యతిరేక యాంటీబాడీల జన్యుసమాచారాన్ని గుర్తించారు. ఈ వివరాలను వడపోసి.. ప్రత్యేకించి వైరస్‌ స్పైక్‌ ప్రొటీన్‌ను లక్ష్యంగా ఎంచుకుంటున్న యాంటీబాడీలను పసిగట్టారు. వాటిని ల్యాబ్‌లో పరీక్షించగా.. లామా, అల్‌పాక్‌సలలో విడుదలైన నాలుగు యాంటీబాడీలు కరోనా వైర్‌సకు ఆయువు పట్టుగా ఉండే స్పైక్‌ ప్రొటీన్‌పై ముప్పేట దాడి చేస్తున్నట్లు నిర్ధారణ అయింది.
Updated Date - 2021-01-14T07:21:26+05:30 IST