అమెజాన్..చడీచప్పుడూ లేకుండా చక్కబెట్టేసింది.. నెటిజన్లు గగ్గోలు పెట్టారని..
ABN, First Publish Date - 2021-03-03T23:08:46+05:30
ప్రజాభీష్టం మేరకు తమ లోగోల్లో మార్పులు చేస్తున్న సంస్థల్లో తాజాగా ఈ-కామర్స్ దిగ్గజం అమెజాన్ కూడా వచ్చి చేరింది.
న్యూఢిల్లీ: ప్రజాభీష్టం మేరకు తమ లోగోల్లో మార్పులు చేస్తున్న సంస్థల్లో తాజాగా ఈ-కామర్స్ దిగ్గజం అమెజాన్ కూడా వచ్చి చేరింది. అమెజాన్ లోగోలో చిరునవ్వును సూచించే గుర్తుతో పాటూ దానిపై చిన్న నీలి రంగు రిబ్బన్ కూడా ఉంటుందన్న విషయం తెలిసిందే. అయితే..ఈ డిజైన్ హిట్లర్ మీసాన్ని గుర్తుకు తెస్తోందని అనేక మంది అభ్యంతరం వ్యక్తం చేశారు. దీంతో అమెజాన్ వెంటనే తన లోగోలు మార్పులు చేసింది.
ప్రస్తుత లోగోను అమెజాన్ జనవరిలో ఆవిష్కరించింది. అయితే..ఇది నెటిజన్ల దృష్టిలో పడగానే అందులోని లోపాలు తెరపైకి వచ్చాయి. ముఖ్యంగా ఆ నీలిరంగు రిబ్బన్ నియంత హిట్లర్ మీసాన్ని గుర్తుకు తెస్తోందని అనేక మంది అభ్యంతరం తెలిపారు. ఇది బాలేదంటూ పెదవి విరుస్తున్న వారి సంఖ్య నానాటీకి పెరుగుతుండటంతో అమెజాన్ ఏ చడీచప్పుడూ లేకుండా దిద్దుబాటు చర్యలకు పూనుకుంది. ఎటువంటి అధికారిక ప్రకటనా లేకుండా లోగోలో మార్పులు చేసేసింది. హిట్లర్ మీసాన్ని గుర్తుకు తెస్తున్న రిబ్బన్ స్థానంలో మడతపెట్టినట్టు ఉన్న టేప్‌ను ప్రవేశపెట్టింది. వినియోగదారుల అభిప్రాయాల అనుసరించి ప్రభుత్వం ఈ నిర్ణయం తీసుకున్నట్టు తెలుస్తోంది. ‘కస్టమర్లను ఆశ్చర్యపరిచేందుకు అమెజాన్ నిరంతరం ప్రయత్నిస్తుంటుంది. అమెజాన్‌లో షాపింగ్ చేసే వినియోగదారుల్లో ఉత్సాహం, తరువాత ఏ సర్‌ప్రైజ్ రాబోతోందా అనే ఉత్సుకత ప్రేరేపించేలా ఈ లోగోను డిజైన్ చేశాం. అని అమెజాన్ ప్రతినిధి ఒకరు వ్యాఖ్యానించారు. కాగా.. గతంలో మింత్రా కూడా ప్రజల కోరిక మేరకు తన లోగోలో మార్పు చేసిన విషయం తెలిసిందే.
Updated Date - 2021-03-03T23:08:46+05:30 IST