పోరాట పద్యం ఏమున్నదిక్కడ ! ..
ABN, First Publish Date - 2021-03-22T06:44:07+05:30
బండారు రంగస్థల పద్యాల్లా గర్జించి గాండ్రించి పొగలు చిమ్మే భూముల్ని దినం రోజున మరమరాల ఫలహారంలా పంచాక కూడా...
బండారు రంగస్థల పద్యాల్లా
గర్జించి గాండ్రించి పొగలు చిమ్మే భూముల్ని
దినం రోజున మరమరాల ఫలహారంలా పంచాక కూడా
బైబులు చేతిలోనే ఉంది
మన భూములు లాక్కున్న భారతీయులెవరు
ప్రధమ ఫలాన్ని చర్చ్‌లో మిషన్‌ వారి దేవుని పాటగా
మాటవరసకు రెండుమూడుసార్లు పాడి కొట్టేసిన్నట్లు
శిలీంధ్రాలన్నిటికీ సెటిలర్స్‌గా శాశ్వత ముద్రపడ్డా
మాతృకణ జీవసమూహలన్నిటితో కలిసి ఏకమై పోరినా
ఉక్కులా పైకిలేచిన మహావృక్షం ఒక్క అవకాశమూ లేక
ఆస్తులుపోయి తప్పిపోయిన కుమారుడయ్యింది
రాచనెలవుగా మార్చుకున్న రాచిలుకల చిరునామాలు
యంత్రశాలలపై తీగపాకిన ఆకాంక్షల కాలనీల్లో
బుల్డోజర్‌ కింద నలిగి
అంబ పలకని జగదాంబ పలకని బుడబుక్కలోళ్ళ ద్విపదల్లా అంతరించిపోతాయి
ప్రభుత్వ విహంగం రెక్కలు విరిగి ప్రభువునందు నిద్రిస్తుంది
అవ్యాచ్య కాదుగానీ
గోంగూరను ఆంధ్రమాతగా రాసిన కీర్తనలే పాడి
పురుగుపట్టని పండు మిరప తొక్కును పెరుగులో నాకి
శ్రీనాధుడి కమ్మటి తెలుగు భోజన రుచులే చాటువులనుకుని
గ్లట్టన్‌ ఇష్టపద్యాలు చదవడమేగానీ
పోరాట పద్యం ఏమున్నదిక్కడ !
పచ్చి తాటాకుల పందిళ్ళలో పెళ్లిళ్లు చేసుకున్న దేశం
ప్రవేటు కనోపీలకింద ఈతచాపల ధ్యానానికి జుగల్బందీ అవుతుంది
సకలాంధ్రుల ఆత్మగౌరవం ‘బిక్రీ కేలియే నహీ’ యని
బిగ్గరగా అరిచి చెప్పేదెవడు ఓ తెలుగు బాలా!
గుండెకాయను కోసి ఆవకాయలా అమ్ముకున్నాక
దేహానికి గుండెకాయ ప్రాణావసరతల గురించి వారసత్వ సంపదలన్నీ
ఉత్తరాదికి ఊరగాయ అవుతున్న ముషాయిరాల్లో
తోడేలే గొర్రెలకు ప్రబోధ కవితలు భేషుగ్గా వినిపిస్తుంది
ఆంధ్రాబాంక్‌ హుళక్కి అయ్యాక
దేనికీ తెలుగు కవచకుండలాలు లేవు
దేశభక్తి నృత్యరూపకం మీద తెరలేచిన వాదానికి
ఏ తాయిలాల పేలాలూ పేలంగీలూ పేలలూ
ఏ నిరుపేదలూ ఉచితంగా పొందడానికి లేదు
ఒక శ్వాసను పీల్చాలంటే
ఒక ఊపిరిని అమ్మకానికి వదలాలి
సోలార్‌ సబ్సిడీ సూర్యుడు కూడా ధనిక కొంపలమీదే ఉదయిస్తాడు
ఈ దేశానికిక సోషలిస్టు కాయలు కాస్తాయో లేదో !
(విశాఖ ఉక్కు ఫాక్టరీ కోసం నాడు నిరాహార దీక్ష చేసి సాధించిన కీర్తిశేషులు అమృతరావుగారికి )
తుల్లిమల్లి విల్సన్‌ సుధాకర్‌
9538053030
Updated Date - 2021-03-22T06:44:07+05:30 IST