అనగనగా ఒక దేశముండెనే!
ABN, First Publish Date - 2021-05-17T06:11:47+05:30
అనగనగా ఒక దేశముండెనే - గలగల పారే ఏరులుండెనే ఏటిలో ఈదే చేపలుండెనే - చల్లని నీటిలో చేపలు తుళ్ళెనే...
అనగనగా ఒక దేశముండెనే - గలగల పారే ఏరులుండెనే
ఏటిలో ఈదే చేపలుండెనే - చల్లని నీటిలో చేపలు తుళ్ళెనే
అన్నం పెట్టే పొలాలుండెనే - పొలాలలో వరి కంకులూగేనే
కంకులపైన చిలకలు వాలెనే - చిలకలు ఎన్నో పాటలు పాడెనే
మట్టి దారుల చెట్లు పెరిగినే - చెట్లు పరిచిన నీడలుండెనే
నీడల ఆసర ఆడుతు పాడే - గోసి పోరల గుంపులుండెనే
అన్ని దిక్కులకు దారులుండెనే - అడ్డుగోడల అలజడి లేదే
దారులనిండా మల్లెలుండెనే - మంచిమాటలకు విలువలుండెనే
అక్కడ ఎన్నో మతాలుండెనే - మతాలు మించిన మమత లుండెనే
దేవుని పేరిట మతాల పేరిట - గొడవలె లేని గుడులు వుండెనే
కురిసెను జోరుగ చల్లని వానలు - లేవే నరకపు వేడిగాడ్పులు
లేనే లేదే దొంగల దోపిడి - కానేకాదే తిన్నది విషము
ఒక ఇంట్లో పొయ్యి వెలిగితే - పొరుగింట్లో ఆకలి తీరెనే
ఏ కంట్లో నీరు ఒలికినా - ఊరంత ఉరికొచ్చి నిలిచెనే
ఆ దేశం మీకు కనిపించిందా - ఆ దేశం లేదని వినిపించిందా
శోకం తోనా లోకం వీడి - కలలా దేశం చెదిరి పోయెనే
(ముహాద్‌ వెంబాయం మలయాళ భాషలో రాసిన ఈ పాటకు
ఒక తమిళం అనువాదం నుంచి చేసిన తెలుగు అనువాదమిది)
సుధాకిరణ్‌
Updated Date - 2021-05-17T06:11:47+05:30 IST