1. • Home » Editorial » Appude ekkadiki

అప్పుడే ఎక్కడికి?

సూర్యుడిని వండుకొని, చంద్రుడిని నంజుకొని, చుక్కలను అద్దుకున్న మేఘాలను కప్పుకొని భూమిని ఆకాశాన్ని కాళ్లు చేతులు చేసుకొని...

సూర్యుడిని వండుకొని, చంద్రుడిని నంజుకొని, 

                     చుక్కలను అద్దుకున్న మేఘాలను కప్పుకొని 

భూమిని ఆకాశాన్ని కాళ్లు చేతులు చేసుకొని 

పెంచుకున్న సంపదనంతా వదిలిపెట్టి ఎక్కడికి పోతున్నారు?

చితాగ్ని కెరటాలు ధరించి ఏ లోకాన్ని ఏలాలనుకుంటున్నారు? 

ఎక్కడ ఏ వజ్రాల గనులున్నాయని 

జీవితానుభవాల పలుగు పార పట్టుకొని పరుగెడుతున్నారు? 

రోగి ఛాతి మీద ఆనించిన హృదయభారమితిని అలాగే వదిలేసి 

ఆఫీసు ఫైలుపై సంతకం పూర్తి కాకముందే బయలుదేరి 

ఎక్కడి పనులు అక్కడే ఆపేసి 

ఈ వయా యమాసుపత్రుల పయనమెక్కడికి? 

అమ్మ నాన్న, తమ్ముడు అన్న, అక్క చెల్లెలు, 

సహచరులు బిడ్డలు, ప్రియుడు ప్రేయసి, 

తోడు నడిచిన, నవ్విన ఏడ్చిన ఏడ్పించిన వారందరిమీద పెంచుకొని దాచుకున్న 

చల్లని వెచ్చని కనుసంద్రాలను ఏ భూమిలో పోసి ఏ వర్షాలు కురిపించాలని 

ఏ పంటలను పండించాలనే భ్రమలతో సాగిపోతున్నారు?

అక్కడి నుంచి మా మీద కూడా చినుకులై మళ్లీ మళ్లీ కురుస్తారా 

మమ్మల్ని కూడా ఈ మురుగు కాల్వల్లోంచి మీ దగ్గరకు చేదుకుంటారా?

మీ చేత, మీ ఓటు చేత పద్మాసనం వేయించి 

మీ శ్వాసలను నడిమధ్యలోనే చిదిమేసి, 

మా మీద మీరు పెట్టుకున్న గాఢ విశ్వాసాన్ని 

పరిపరి వేషాలతో వమ్ము చేసిన మా నిర్వాకాన్ని 

ఆ విధంగానైనా మాకు గుర్తు చేస్తారా, మమ్మల్ని ఎప్పటికైనా క్షమిస్తారా 

మీ రంగు రంగుల కొన ఊపిరి బాధల కుంచెలతో 

మా రాజపీఠాల మీద మమ్మల్ని మనుషులుగా కాక 

దయ్యాలుగానైనా చిత్రించి మా తప్పును మన్నిస్తారా?

నిజం