డీఎల్‌పురంలో చిన్నారిని కాటేసి.. కుక్క మృతి!
ABN, First Publish Date - 2021-01-19T06:16:49+05:30
ఇక్కడి సీహెచ్‌సీలో చిల్డ్రన్‌ స్పెషలిస్ట్‌ డాక్టర్‌ గ్లోరీ తబిత చొరవతో ఓ చిన్నారి ప్రాణాపాయ స్థితి నుంచి బయటపడింది.
నక్కపల్లి ఆస్పత్రికి తరలించిన తల్లిదండ్రులు
ప్రత్యేక చికిత్సతో తప్పిన ప్రమాదం
నక్కపల్లి, జనవరి 18 : ఇక్కడి సీహెచ్‌సీలో చిల్డ్రన్‌ స్పెషలిస్ట్‌ డాక్టర్‌ గ్లోరీ తబిత చొరవతో ఓ చిన్నారి ప్రాణాపాయ స్థితి నుంచి బయటపడింది. ఎస్‌.రాయవరం మండలం లక్ష్మీపతిరాజుపేటకు చెందిన పి.మంగలక్ష్మి తన కుటుంబంతో కలిసి ఇటీవల నక్కపల్లి మండలం డీఎల్‌పురంలో వున్న పుట్టింటికి వచ్చింది. సోమవారం ఆమె కుమార్తె పి.దివ్యశ్రీ (4)కి వీధి కుక్క చేతిపై కాటు వేసింది. ఆ తరువాత ఆ కుక్క చనిపోవడంతో తల్లిదండ్రుల్లో తీవ్ర ఆందోళన మొదలైంది. వెంటనే ఆ బాలికను నక్కపల్లి ఆస్పత్రికి తీసుకు వచ్చారు. సాధారణంగా ఇక్కడ కుక్కకాటుకు ఏఆర్‌వీ వ్యాక్సిన్‌ మాత్రమే వేస్తారు. అయితే, ఆ సమయంలో విధుల్లో ఉన్న డాక్టర్‌ గ్లోరీ తబిత ఏఆర్‌వీ వ్యాక్సిన్‌తో పాటు యాంటీ ర్యాబిస్‌ ఇమ్యునో గ్లోబిలెన్స్‌ సీరం ఇంజక్షన్‌ కూడా వేయడంతో ఆ బాలికకు ప్రమాదం తప్పిందని ఆస్పత్రి సూపరింటెండెంట్‌ డాక్టర్‌ జనార్దనం తెలిపారు.
Updated Date - 2021-01-19T06:16:49+05:30 IST