భావన్నారాయణునికి సూర్యకిరణాభిషేకం
ABN, First Publish Date - 2021-03-07T07:03:58+05:30
భావన్నారాయణున్ని భానుడు అభిషేకించిన సుందర దృశ్యం మండలంలోని పెదగంజాం గ్రామంలో శనివారం ఉదయం ఆవిష్కృతమైంది.
చినగంజాం, మార్చి 6 : భావన్నారాయణున్ని భానుడు అభిషేకించిన సుందర దృశ్యం మండలంలోని పెదగంజాం గ్రామంలో శనివారం ఉదయం ఆవిష్కృతమైంది. ప్రతి సంవత్సరం మార్చి, అక్టోబరు మొదటివారాల్లో భావనారాయణస్వామిని సూర్య కిరణాలు తాకుతాయి. ఈ నెల ప్రారంభం నుంచి భక్తులు ఈ అపూర్వదృశ్యాన్ని చూసేందుకు రోజూ ఉదయం ఆలయం వద్దకు వస్తుంటారు. శనివారం ఉదయం 6.25 నుంచి 6.35 వరకు భానుడి సూర్యకిరణాలు భూనీల సమేత భావనారాయణస్వామి ఆలయంలో కనువిందు చేశాయి. స్వామి మూలవిరాట్టు ఎడమ చేతి శంఖం నుంచి పాదాల వరకు, అమ్మవారి కుడి చేతిని సూర్యకిరణాలు తాకే అపూర్వదృశ్యాన్ని భారీగా తరలివచ్చిన భక్తులు చూసి తరించారు. ఆలయ అర్చకులు బృందావనం రాఘవాచార్యులు ఈ సందర్భంగా ప్రత్యేక పూజలు నిర్వహించి తీర్థ ప్రసాదాలు అందజేశారు. ఈనెల 9వ తేదీ వరకు స్వామిని సూర్యకిరణాలు తాకే అవకాశం ఉందని అర్చకులు తెలిపారు.
Updated Date - 2021-03-07T07:03:58+05:30 IST