వాల్మీకులను ఎస్టీలుగా గుర్తించాలి
ABN, First Publish Date - 2021-11-28T05:27:30+05:30
కేంద్ర ప్రభుత్వం వాల్మీకులను ఎస్టీ జాబితాలో చేర్చాలని మాజీ మంత్రి కాలవ శ్రీనివాసులు డిమాండ్‌ చేశారు.
కేంద్రంపై ఒత్తిడి పెంచేందుకు ఉద్యమం
నేడు అనంతలో అఖిల భారత వాల్మీకి సమ్మేళనం
హాజరుకానున్న ఎనిమిది వాల్మీకి పీఠాల జగద్గురువులు...
14 రాషా్ట్రల ప్రతినిధులు : మాజీ మంత్రి కాలవ వెల్లడి
అనంతపురం వైద్యం, నవంబరు 27: కేంద్ర ప్రభుత్వం వాల్మీకులను ఎస్టీ జాబితాలో చేర్చాలని మాజీ మంత్రి కాలవ శ్రీనివాసులు డిమాండ్‌ చేశారు. ఈ మేరకు కేంద్ర ప్రభుత్వంపై ఒత్తిడి తెచ్చేందుకు దక్షిణ భారతదేశంలోనే తొలిసారిగా అనంతపురంలో అఖిల భారత వాల్మీకుల సమ్మేళనాన్ని ఆదివారం స్థానిక ఎంవైఆర్‌ ఫంక్షన హాల్‌లో నిర్వహిస్తున్నామన్నారు. శనివారం ఆ ఏర్పాట్లను ఎంపీ తలారి రంగయ్య, జడ్పీ చైర్‌పర్సన బోయ గిరిజమ్మ, ఏడీసీసీ బ్యాంక్‌ చైర్మన లిఖితతో కలిసి పరిశీలించిన ఆయన మీడియాతో మాట్లాడారు. దశాబ్దాలుగా వాల్మీకులను ఎస్టీలుగా గుర్తించాలని రాష్ట్రంలోని పోరాటం సాగిస్తూనే ఉన్నామన్నారు. ఈ మేరకు అన్ని ప్రభుత్వాలపై ఒత్తిడి పెడుతున్నామన్నారు. టీడీపీ హయాంలో నాటి సీఎం నారా చంద్రబాబు నాయుడు కేబినెట్‌తో పాటు శాసనసభలోనూ ఈ ఆంశానికి ఆమోదం తెలిపి.. కేంద్ర ప్రభుత్వానికి ఫైల్‌ పంపించారన్నారు. మూడేళ్లయినా కేంద్రం దీనిపై ఎలాంటి నిర్ణయమూ తీసుకోకుండా నిర్లక్ష్యంగా ఉందన్నారు. ఈ నేపథ్యంలో కేంద్రంపై ఒత్తిడి తెచ్చేందుకు రాజకీయాలకు అతీతంగా ఈ సమ్మేళనాన్ని నిర్వహిస్తున్నామన్నారు. ఇందులో దేశంలోని ఎనిమిది వాల్మీకి పీఠాల జగద్గురువులు, 14 రాషా్ట్రలకు చెందిన 40 మంది ప్రతినిధులు హాజరవుతారన్నారు. పెద్దఎత్తున వాల్మీకులు హాజరై, ఈ సమ్మేళనాన్ని విజయవంతం చేయాలని పిలుపునిచ్చారు. వీరి వెంట పామిడి వీరాంజనేయులు, తలారి ఆదినారాయణ, పూల నాగరాజు, రామచంద్ర, బ్రహ్మయ్య, పీవీ పార్థసారథి ఉన్నారు.
Updated Date - 2021-11-28T05:27:30+05:30 IST