బ్యాట్స్‌మెన్‌ను బంతితో కొట్టిన బౌలర్.. 5 పరుగులిచ్చిన అంపైర్!
ABN, First Publish Date - 2020-08-03T04:03:59+05:30
క్రికెట్ మ్యాచ్ సందర్భంగా ఓ బౌలర్ తనవైపు వచ్చిన బంతిని బ్యాట్స్‌మెన్ వైపు బలంగా విసిరాడు.
లాంకన్‌షైర్: క్రికెట్ మ్యాచ్ సందర్భంగా ఓ బౌలర్ తనవైపు వచ్చిన బంతిని బ్యాట్స్‌మెన్ వైపు బలంగా విసిరాడు. వేగంగా దూసుకెళ్లిన ఆ బంతి బ్యాట్స్‌మెన్‌కు తగిలింది. దీన్ని తప్పుబట్టిన అంపైర్ బ్యాటింగ్ చేస్తున్న జట్టుకు ఐదు పరుగులు అదనంగా జతచేశాడు. ఈ ఘటన ఇంగ్లండ్ కౌంటీ క్రికెట్‌లో జరిగింది. బాబ్ విల్లీస్ ట్రోఫీలో భాగంగా లాంకన్‌షైర్, లీసెస్టర్‌షైర్ జట్ల మధ్య మ్యాచ్ ఆదివారం జరిగింది. ఈ సందర్భంగా లీసెస్టర్‌షైర్ జట్టు సభ్యుడు డీటర్ క్లెయిన్ బౌలింగ్ చేస్తున్నాడు. అప్పడు బ్యాటింగ్ చేస్తున్న డ్యానీ లాంబ్ స్ట్రయిట్ షాట్ ఆడాడు. తనవైపే వచ్చిన బంతిని వెంటనే అందుకున్న డీటర్.. డ్యానీ వైపు బలంగా బంతిని విసిరాడు . అది డ్యానీకి తగిలింది. దీన్ని చూసిన అంపైర్ అది ప్రమాదకరమైన త్రో అని, నేరుగా బ్యాట్స్‌మెన్‌కు తగిలిందని డీటర్‌ను మందలించాడు. ఆ తర్వాత లాంకన్‌షైర్ జట్టుకు అదనంగా 5 పెనాల్టీ పరుగులు జతచేస్తున్నట్లు ప్రకటించాడు.
Updated Date - 2020-08-03T04:03:59+05:30 IST