మర్రే అవుట్‌
ABN, First Publish Date - 2020-09-28T10:56:25+05:30
మూడు గ్రాండ్‌స్లామ్‌ల విజేత.. బ్రిటన్‌ స్టార్‌ ఆటగాడు ఆండీ మర్రేకు 16వ సీడ్‌ స్టాన్‌ వావ్రింకా (స్విట్జర్లాండ్‌) షాకిచ్చాడు.
హలెప్‌, అజరెంకా శుభారంభం
ఫ్రెంచ్‌ ఓపెన్‌ను వణికిస్తున్న చలి
పారిస్‌: మూడు గ్రాండ్‌స్లామ్‌ల విజేత.. బ్రిటన్‌ స్టార్‌ ఆటగాడు ఆండీ మర్రేకు 16వ సీడ్‌ స్టాన్‌ వావ్రింకా (స్విట్జర్లాండ్‌) షాకిచ్చాడు. ఆదివారం ప్రారంభమైన ఫ్రెంచ్‌ ఓపెన్‌లో పురుషుల సింగిల్స్‌ తొలి రౌండ్లో 33 ఏళ్ల మర్రే 1-6, 3-6, 2-6తో వావ్రింకా చేతిలో పరాజయం పాలయ్యాడు. మరో మ్యాచ్‌లో ఆస్ట్రేలియా ఓపెన్ మాజీ చాంపియన్‌ పీటర్‌ కోర్డా కుమారుడు సెబాస్టియన్‌ కొర్డా 6-2, 4-6, 6-3తో ఆండ్రెస్‌ సెప్పీ (ఇటలీ)పై పోరాడి గెలిచాడు. మహిళల విభాగంలో సిమోనా హలెప్‌, విక్టోరియా అజరెంకా శుభారంభం చేశారు. 29వ పుట్టిన రోజు జరుపుకుంటున్న హలెప్‌ (రొమేనియా) 6-4, 6-0తో సారా టొర్మో (స్పెయిన్‌)పై తొలి రౌండ్లో నెగ్గి ముందంజ వేసింది. తొలి సెట్‌లో హలెప్‌కు సారా కొంతమేర పోటీ ఇచ్చినా రెండో సెట్‌లో మాత్రం పూర్తిగా తేలిపోయింది. మరో మ్యాచ్‌లో బెలారస్‌ స్టార్‌ అజరెంకా 6-1, 6-2తో డంకా కొవినిక్‌పై విజయం సాధించి రెండో రౌండ్లో ప్రవేశించింది. అమెరికా వెటరన్‌ క్రీడాకారిణి వీనస్‌ విలియమ్స్‌ 4-6, 4-6తో అన్నా కరోలినా (స్లొవేకియా) చేతిలో పరాజయం పాలై తొలి రౌండ్లోనే ఇంటిముఖం పట్టింది. ఇక, ఈ పోటీల్లో టెన్నిస్‌ స్టార్లను చలి వాతావరణం వణికిస్తోంది. ఉష్ణోగత్ర 8 డిగ్రీలకు పడిపోవడంతో పాటు శీతల గాలులు బలంగా వీస్తుతుండడంతో ప్లేయర్లు చలిని తట్టుకునే దుస్తులను వేసుకొని ఆడాల్సి వచ్చింది.
Updated Date - 2020-09-28T10:56:25+05:30 IST