కారు బోనెట్లో కొండచిలువ చిలువ కలకలం
ABN, First Publish Date - 2020-12-26T13:49:45+05:30
కారు బోనెట్లో చిక్కుకున్న ఒక కొండచిలువ కాసేపు అక్కడివారినందరినీ భయభ్రాంతులకు గురిచేసింది....
ఆగ్రా: కారు బోనెట్లో చిక్కుకున్న ఒక కొండచిలువ కాసేపు అక్కడివారినందరినీ భయభ్రాంతులకు గురిచేసింది. యూపీలోని ఆగ్రాలో గల ఎల్ఐసీ కాలనీలో ఒక కారు బోనెట్లో పెద్ద కొండచిలువ చిక్కుకుంది. దానిని చూసిన ఆ కారు యజమాని, కుటుంబ సభ్యులు హడలెత్తిపోయారు. ఈ వార్త తెలుసుకున్నవారంతా సంఘటనా స్థలానికి చేరుకున్నారు. వైల్డ్ లైఫ్ టీమ్కు సమాచారం అందించారు. వారు అతి కష్టం మీద ఆ కొండచిలువను కారు బోనెట్ నుంచి బయటకు తీయగలిగారు.
తరువాత దానిని సురక్షితంగా అడవిలో విడిచిపెట్టారు. ఈ కాలనీలో గురుమీత్ సింగ్ సోఢీ కుటుంబం ఉంటోంది. వారు తమ కారును ఇంటి బయట నిలిపివుంచుతుంటారు. గురువారం ఉదయం వారికి ఆ కారు బోనెట్ లాక్లో నాలుగడుగుల కొండ చిలువ కనిపించింది. దీంతో వారికి ప్రాణాలు పోయినంతపనైంది. విషయం తెలుసుకున్న చుట్టుపక్కలవారు అక్కడకు చేరుకున్నారు. వారు ఆ కొండచిలువను కదిలించే ప్రయత్నం చేశారు. అయితే అది అక్కడి నుంచి ఏమాత్రం కదలలేదు. దీంతో వారు ఈ విషయాన్ని వైల్డ్ లైఫ్ ఎస్ఓఎస్ టీమ్కు తెలియజేశారు. వారు అరగంటపాటు రెస్క్యూచేసి, ఆ కొండచిలువను బయటకు తీశారు. ఆరోగ్య పరీక్షలు నిర్వహించిన అనంతరం దానిని అడవిలో విడిచిపెట్టారు. ఈ సందర్భంగా వైల్డ్లైఫ్ సంస్థ సీఈవో కార్తీక్ నారాయణ్ మాట్లాడుతూ పాముల విషయంలో ప్రజల్లో ఉన్న అపోహలను తొలగించడమే తమ లక్ష్యమన్నారు. పామును చూడగానే దానిని కొట్టి చంపకూడదని అన్నారు.
Updated Date - 2020-12-26T13:49:45+05:30 IST