యూఏఈలో అన్ని విమాన సర్వీసులు బంద్ !
ABN, First Publish Date - 2020-03-23T15:46:45+05:30
కరోనావైరస్(కొవిడ్-19) వ్యాప్తి, నియంత్రణ నేపథ్యంలో యూఏఈ తాజాగా మరో కీలక నిర్ణయం తీసుకుంది.
యూఏఈ: కరోనావైరస్(కొవిడ్-19) వ్యాప్తి, నియంత్రణ నేపథ్యంలో యూఏఈ తాజాగా మరో కీలక నిర్ణయం తీసుకుంది. రెండు వారాలపాటు అన్ని విమాన సర్వీసులు నిలిపివేస్తున్నట్లు ప్రకటించింది. ఆ దేశ జాతీయ అత్యవసర, సంక్షోభం మరియు విపత్తుల నిర్వహణ శాఖలు... సివిల్ ఏవియేషన్ అథారిటీ(సీఏఏ) అధికారులతో చర్చించి ఈ మేరకు నిర్ణయం తీసుకున్నారు. కాగా, అత్యవసర తరలింపు విమానాలు, కార్గో విమానాలకు దీని నుంచి మినహాయింపు ఉంటుందని సీఏఏ పేర్కొంది. ఆరోగ్య మంత్రిత్వ శాఖ సిఫారసుల ప్రకారం అన్ని ముందు జాగ్రత్త చర్యలను పరిగణనలోకి తీసుకోవడం జరిగిందని ఈ సందర్భంగా సీఏఏ తెలిపింది. రెండు వారాల తర్వాత విమాన సర్వీసులు తిరిగి ప్రారంభమైన సమయంలో ప్రయాణికులు, విమాన సిబ్బంది, విమానాశ్రయ అధికారుల ఆరోగ్య భద్రత దృష్ట్యా ఐసోలేషన్, ఆరోగ్య పరీక్షలు నిర్వహించేందుకు ఏర్పాట్లు చేస్తామని సీఏఏ అధికారులు వెల్లడించారు.
Updated Date - 2020-03-23T15:46:45+05:30 IST