బీజింగ్లో ఒక్క కరోనా కేసు కూడా నమోదు కాలేదు: హెల్త్ కమిషన్
ABN, First Publish Date - 2020-07-07T23:06:43+05:30
చైనా రాజధాని బీజింగ్లో గడిచిన 24 గంటల్లో ఒక్క కరోనా కేసు కూడా నమోదు
బీజింగ్: చైనా రాజధాని బీజింగ్లో గడిచిన 24 గంటల్లో ఒక్క కరోనా కేసు కూడా నమోదు కాలేదని అక్కడి హెల్త్ కమిషన్ వెల్లడించింది. ఇటీవల బీజింగ్‌ను కరోనా మహమ్మారి మరోమారు కుదిపేసిన విషయం తెలిసిందే. జూన్ 11న ఓ హోల్‌సేల్ ఫుడ్ మార్కెట్‌లో కొత్తగా కేసులు బయటపడటంతో ప్రభుత్వం బీజింగ్లో మరోమారు పూర్తిస్థాయి లాక్‌డౌన్‌ను విధించింది. ప్రజలు ఇళ్లకే పరిమితం కావాలని సూచించింది. అంతేకాకుండా ప్రారంభమైన స్కూళ్లను సైతం మూసివేయించింది. బీజింగ్‌లోని 90 శాతం ప్రజలకు ఈ ఫుడ్ మార్కెట్ నుంచే కూరగాయలు, పండ్లు వెళ్తాయి. దీంతో అధికారులు వెంటనే అప్రమత్యమయ్యారు. కరోనా వ్యాప్తి చెందకుండా జాగ్రత్తలు తీసుకుంటూ వెళ్లారు. రెండో క్లస్టర్‌లో భాగంగా మొత్తంగా ఈ ప్రాంతంలో 335 కేసులు బయటపడినట్టు హెల్త్ కమిషన్ తెలిపింది. ఇందులో 15 మంది పూర్తిగా కోలుకోగా.. 320 మంది ఆసుపత్రిలో చికిత్స పొందుతున్నారు. లక్షణాలు లేని 31 మంది వైద్యుల పర్యవేక్షణలో ఉన్నారు. కాగా.. చైనా వ్యాప్తంగా చూసుకుంటే మంగళవారం ఎనిమిది కరోనా కేసులు నమోదయ్యాయి. కొత్తగా నమోదైన కేసులతో మొత్తం కేసుల సంఖ్య 83,565కు చేరింది. మరోపక్క చైనాలో ఇప్పటివరకు 78,528 మంది పూర్తిగా కోలుకోగా.. 4,634 మంది మరణించారు.
Updated Date - 2020-07-07T23:06:43+05:30 IST