ఆరు లక్షల కేసులతో కాలిఫోర్నియా కొత్త రికార్డు!
ABN, First Publish Date - 2020-08-15T07:21:36+05:30
ప్రపంచంలో అత్యధిక కరోనా కేసులు, మరణాలు అమెరికాలోనే నమోదైన విషయం తెలిసిందే.
శాక్రమెంటో: ప్రపంచంలో అత్యధిక కరోనా కేసులు, మరణాలు అమెరికాలోనే నమోదైన విషయం తెలిసిందే. అయితే అమెరికాలో అత్యధిక కరోనా కేసులు మాత్రం కాలిఫోర్నియాలో నమోదయ్యాయి. తాజాగా కాలిఫోర్నియాలో కేసుల సంఖ్య ఆరు లక్షలు దాటింది. కొత్తగా నమోదైన కేసులతో కలిపి కాలిఫోర్నియాలో మొత్తం కేసుల సంఖ్య 6,02,997గా ఉంది. అమెరికాలో మరే రాష్ట్రంలోనూ ఇప్పటివరకు 6 లక్షల కేసులు నమోదుకాలేదు. ఈ రాష్ట్రంలో నిత్యం దాదాపు పది వేల కేసులు నమోదవుతున్నాయి. మరోపక్క కాలిఫోర్నియాలో ఇప్పటివరకు కరోనా కారణంగా 10,999 మంది ప్రాణాలు కోల్పోయారు. కేసుల విషయంలో టాప్ స్థానంలో ఉన్నప్పటికి.. మరణాల విషయంలో మాత్రం న్యూయార్క్ రాష్ట్రం 32,805 మరణాలతో అత్యధిక స్థానంలో నిలిచింది. ఇక కాలిఫోర్నియా తరువాత ఫ్లోరిడాలో 5.57 లక్షలకు పైగా కేసులు, టెక్సాస్‌లో 5.3 లక్షలకు పైగా కేసులు నమోదయ్యాయి. ప్రస్తుతం అమెరికాలో ఈ మూడు రాష్ట్రాలు కరోనాకు కేంద్రాలుగా మారాయి. అమెరికాలో ఇప్పటివరకు 54 లక్షలకు పైగా కేసులు నమోదుకాగా.. అందులో దాదాపు 18 లక్షల కేసులు ఈ మూడు రాష్ట్రాల్లోనే నమోదయ్యాయి. ఇక అమెరికా వ్యాప్తంగా ఇప్పటివరకు లక్షా 70 వేలకు పైగా కరోనా బారిన పడి ప్రాణాలు కోల్పోయారు.
Updated Date - 2020-08-15T07:21:36+05:30 IST