నియంత్రణలో ఉందాం!
ABN, First Publish Date - 2020-05-22T05:30:00+05:30
అవసరం లేని భౌతిక సామీప్యాలూ, అగత్యం లేని మాటలూ, అక్కర లేని ప్రయాణాలూ అనర్థం తెచ్చి పెడతాయని కరోనా వైరస్ మనల్ని హెచ్చరిస్తోంది. అయినా సరే, పని లేకపోయినా వీధుల్లోకి వెళ్ళాల్సిందేనని బయటకు వస్తున్న ఎంతో మందిని...
అవసరం లేని భౌతిక సామీప్యాలూ, అగత్యం లేని మాటలూ, అక్కర లేని ప్రయాణాలూ అనర్థం తెచ్చి పెడతాయని కరోనా వైరస్ మనల్ని హెచ్చరిస్తోంది. అయినా సరే, పని లేకపోయినా వీధుల్లోకి వెళ్ళాల్సిందేనని బయటకు వస్తున్న ఎంతో మందిని మనం చూస్తున్నాం. ‘ఏదీ మన వరకూ రాదులే!’ అనే అతి విశ్వాసం కన్నా, ‘మన వరకూ వస్తే?’ అనే వివేకం ఉన్నప్పుడే ఈ విపత్తు నుంచి బయటపడగలం. తమ మీద తమకు నియంత్రణ లేనివారికి ఈ వివేకం ఉండదు. ‘‘పాడుపడి, ప్రాకారాలు లేని నగరం ఎలాంటిదో తనను తాను నియంత్రించుకోలేని మనిషి అలాంటివాడు!’’ అని బైబిల్ చెబుతోంది (సామెతలు 25:28). దేవుడు మానవుడికి ప్రసాదించిన శక్తులలో ఒకటి స్వీయ నియంత్రణ లేదా నిగ్రహం.
మనం చేస్తున్న పనుల మీదా, మాట్లాడే మాటల మీదా మనకు నియంత్రణ ఉండాలి. అది లేనప్పుడు చేయాల్సిన పనులు చేయడం మాట అటుంచి, అనవసరమైన ప్రలోభాలకు లొంగిపోతాం. మనసు చేసే గారడీలో పడిపోతాం. మానవులు చేసే పనుల మీద వారికి నియంత్రణ ఉండాలన్నది దేవుడి కోరిక. మనసును మనిషి నియంత్రించలేకపోతే, మనసే అతణ్ణి నియంత్రించి ఆడిస్తుంది. దైవ సమ్మతంగా జీవించడం అంటే - మనపై మనకు నియంత్రణ కలిగి ఉండడం! దాని కోసం ప్రయత్నిద్దాం.
Updated Date - 2020-05-22T05:30:00+05:30 IST