‘పీసా’ను తలదన్నే రత్నేశ్వర మందిర్‌!
ABN, First Publish Date - 2020-09-11T05:30:00+05:30
ఇటలీలోని ‘పీసా టవర్‌’ పేరు వినగానే కాస్త పక్కకు ఒరిగి ఉండే కట్టడం కళ్ళముందు కదులుతుంది. పీసా టవర్‌ నిర్మాణం కొంత జరిగాక, దాని పునాదిలో ఒకవైపున గట్టిదనం లేకపోవడం వల్ల ఆ కట్టడం పక్కకు ఒరిగి పోతోందని గ్రహించారు...
ఇటలీలోని ‘పీసా టవర్‌’ పేరు వినగానే కాస్త పక్కకు ఒరిగి ఉండే కట్టడం కళ్ళముందు కదులుతుంది. పీసా టవర్‌ నిర్మాణం కొంత జరిగాక, దాని పునాదిలో ఒకవైపున గట్టిదనం లేకపోవడం వల్ల ఆ కట్టడం పక్కకు ఒరిగి పోతోందని గ్రహించారు. నిర్మాణం పూర్తయ్యాక నాలుగు డిగ్రీల వంపు స్థిరపడిపోయింది. అదే పీసా టవర్‌కు విశ్వ విఖ్యాతి తీసుకువచ్చింది.
అయితే, దాన్ని తలదన్నే కట్టడం మన దేశంలోనే ఉంది. అదే రత్నేశ్వర్‌ మహాదేవ్‌ మందిరం. ఈ ఆలయం ఉత్తరప్రదేశ్‌లోని సుప్రసిద్ధ పుణ్యక్ష్షేత్రమైన వారణాసిలో, మణికర్ణికా ఘాట్‌ సమీపంలో ఉంది. ఈ ఆలయం తొమ్మిది డిగ్రీల వంపుతో ఒడ్డువైపు ఒరిగిపోతున్నట్టు కనిపిస్తుంది. మరో విశేషం ఏమిటంటే, పీసా టవర్‌ ఎత్తు 54 మీటర్లయితే ఈ రత్నేశ్వరుడి మందిరం ఎత్తు సుమారు 74 మీటర్లు.
ఈ ఆలయ నిర్మాణం గురించీ, ఈ వంపు ఏర్పడడానికి కారణం గురించీ అనేక కథలున్నాయి. వాటిలో ఒక కథ ప్రకారం అయిదు వందల ఏళ్ళ క్రితం రాజా మాన్‌సింగ్‌ సేవకుడొకరు తన తల్లి పేరిట ఈ ఆలయం కట్టించి, ఆమె రుణం తీర్చుకున్నానని గొప్పలు చెప్పుకున్నాడట. అయితే ‘ఎప్పటికీ తీరనిది తల్లి రుణం’ అంటూ ఆ తల్లి ఇచ్చిన శాపంతో ఈ ఆలయం వంగిపోయిందట! అందుకే దీన్ని ‘మాతృ రుణ మందిరం’ అంటారట! ఇలాంటి కథలు మరెన్నో ఉన్నప్పటికీ, 1825 తరువాతే రత్నేశ్వర మహాదేవ్‌ ఆలయ నిర్మాణం జరిగినట్టు రెవెన్యూ రికార్డులు చెబుతున్నాయి. 1860కి ముందు ఈ గుడి నిటారుగానే ఉండేదట! క్రమంగా వంగిపోవడానికి కారణం నదిలో కట్టడం వల్ల పునాదులు కుంగిపోవడమో, బలహీనపడడమోననే అభిప్రాయం ఉంది. ఏది ఏమైనా ఈ ఆలయం వారణాసిలో ముఖ్యమైన పర్యాటక ఆకర్షణగా మారింది.
Updated Date - 2020-09-11T05:30:00+05:30 IST